Almaty qalasy ákimdigi jáne Mádenıet basqarmasynyń qoldaýymen, «Almaty áýenderi» konserttik ujymynyń uıymdastyrýymen «Ǵasyrlar sazy» fólklorly-etnografıalyq ansámblderdiń İİ halyqaralyq dástúrli mýzyka festıvál-baıqaýy ótti. Bul týraly Qamshy portaly Aıqynǵa silteme jasaı otyryp habarlaıdy.

Qala kúnin atap ótý aıasynda Jambyl atyndaǵy Qazaq memlekettik fılarmonıasynda júzege asqan shara Qazaq handyǵynyń 550 jyldyǵyna arnaldy. 

Ulttyq muralarymyzdy ulyqtaýdy maqsat etken mýzyka festıvali alǵash ret 2011 jyly qolǵa alynǵan bolatyn. Bıylǵy jy­ly aýqymyn keńeıtip, alys-jaqyn mem­leketterden qonaqtar shaqyryp, halyq­ara­lyq deńgeıge kóterilip otyr. Baıqaýǵa res­pýb­lıkamyzdyń barlyq oblystary men túr­ki tildes elderdiń etno-folklorlyq an­samblderi, dástúrli ánshi-kúıshiler, mý­zyka zertteýshileri qatysty. Qazylar al­qasy álem sahnalarynda óner kórsetip júr­gen kórnekti qaıratkerler men tanymal tul­ǵalardan jáne belgili mýzykanttardan qu­ral­ǵan. Atap aıtsaq, Ystambul konser­va­to­rıasynyń profesory Jıhan Iýrchı, Re­seı Federasıasynyń eńbek sińirgen ar­tısi, Bashqurtstannyń halyq artısi Ramıl Gaı­zýllın, Ózbekstannyń halyq artısi, dı­rıjer Farýh Sadyqov, Qyrǵyzstannyń ha­lyq artısi, Qyrǵyz ulttyq konservato­rıa­synyń rektory, profesor Muratbek Begalıev, Qazaqstannyń eńbek sińirgen qaıratkeri, qobyzshy-professor Bazarhan Qos­basarov, Qazaqstannyń eńbek sińirgen qaı­ratkeri, «Qurmet» ordeniniń ıegeri Ja­maǵat Temirǵalıev, Qazaqstannyń eńbek sińir­gen artısi, Nurǵısa Tilendıev atyndaǵy «Otyrar sazy» fólklorlyq-etnogra­fıa­lyq ansambliniń dırıjeri Jalǵasbek Begen­di­kov sıaqty maıtalmandar. 
Qazaqstannyń eńbek sińirgen qaıratkeri, «Almaty áýenderi» konserttik birlestiginiń dı­rektory Baǵdat Tilegenovtiń aıtýynsha, 2011 jylǵy dodaǵa 28 ansámbl qatyssa, bıyl olardyń sany 41-ge jetken. Kil júı­rik­terdiń dabysyn estigen shaǵyn qalalarda qurylǵan keı ansámblder shyǵarmashylyq turǵyda ósip-jetilý úshin áriptesteriniń deńgeıin kórip ketýge ózderi ótinish bildiripti. Solardyń biri – Ońtústik Qazaqstan obly­syn­da jasaqtalǵan «Jetisaı sazy» ansambli. Je­tekshisi – kompozıtor, mýzykatanýshy Bóri Isa. 
Adnan Koch jetekshilik etetin túrik  ha­lyq aspaptary ansambli, Kahramon Ba­zarov je­tek­shilik etetin «Aler» ózbek fólklorly-etnog­rafıalyq ansambli, Rysbek Juma­kúnov jetekshilik etetin «Qam­barhan» qyr­­ǵyz fólklorly-etnog­rafıalyq an­sambli jáne Almaty qalasyndaǵy Q.Qo­ja­mıa­rov atyndaǵy memlekettik uıǵyr mý­zy­kalyq komedıa teatry janyndaǵy «Nava» folk­lorly-etnografıalyq ansámbl­deri­niń de bilek sybanyp kelýi básekeniń tar­tysty ótetinin á degennen-aq baıqatty. 

– Qazaq handyǵynyń 550 jyldyǵyna oraı­lastyrylǵan óner merekesi úsh kúnge jos­parlanyp otyr. Birinshi kúni festıvál­diń ashylý saltanaty bolsa, ekinshi kúni qatysýshylardyń konserttik baǵdarlama­lary tyńdalady. Úshinshi kún júldegerlerdi marapattaý rásimi jáne laýreattardyń gala-konsertimen qorytyndylanady. Baıqaý erejesi tórt bólimnen turady. Birinshi bó­lim­de – fólklorly-etnografıalyq an­samb­lmen kúı oınaý, ekinshi bólimde – kez kel­gen kóne halyq aspabymen kúı tartý, úshin­shi bólimde – ansámbldiń súıemelimen vo­kaldyq shyǵarma oryndaý. Al tórtinshi bó­lim – erkin taqyryp. 
Laýreat atanǵan jeńimpazdarǵa arnaıy dıplomdardan bólek, Ahmet Jubanov, Bolat Sa­rybaev atyndaǵy jáne Almaty qalasy ákim­diginiń syılyǵy tabys etiledi. Jan-jaq­tan kelgen qonaqtarymyz ben ónerpaz­darǵa kóterińki kóńil  kúı syılaý úshin  fes­­tıvalge qatysýshylardy saltanatty túrde qyzyl kilemshe ústimen júrgizýdi jón dep taptyq. Sońy festıváldiń resmı ashylýymen jalǵasady, – dep atap ótti BAQ ókilderimen júzdesý barysynda «Ǵasyrlar sa­zy» festıvál-konkýrsynyń uıym­das­tyrýshysy Baǵdat Tilegenov.

                                                       Birinshi kún
Festıvál shymyldyǵy Jambyl atyn­da­ǵy Qazaq memlekettik fılarmonıasynyń konsert zalynda «Sazgen sazy» fólklor­lyq-etnografıalyq ansambliniń oryn­daýyn­da Jaldybaıdyń «Qara jorǵa» kúıi­men ashyldy. Sondaı-aq «Arlan» teatry jaýjúrek babalarymyz kıgen jaýynger kıimderin kórsetip, Qazaqstannyń eńbek sińirgen mádenıet qaıratkeri, akter Bolat Ábdilmanov «Kenesary hannyń amanatyn» jetkizdi. Kesh tizginin qolyna ustaǵan Qa­zaq­stannyń eńbek sińirgen qaıratkeri Aqan Ábdýáli men telejýrnalıst, júrgizýshi Maııa Ve­ronskaıa Almaty qalalyq Tilderdi damytý, mu­raǵattar jáne qujattama basqarmasynyń bas­tyǵy Mamaı Ahet myrzany ortaǵa sha­qyryp, quttyqtaý sóz berdi. 
– Biz uzaq jyldar ózimizdiń tarıhymyzǵa ózge­niń kózimen qarap keldik. Árbir sózimizdi Qy­taıdyń qoljazbasyna, arabtyń joljaz­basy men orystyń  jylnamasyna súıenip sóılegen halyqpyz. Táýelsizdiktiń arqasyn­da bodandyǵymyz umyt bolyp, búgingi tańda álem jurtshylyǵyna óz tilimizben, óz má­de­nıe­timizben qundy ekenimizdi sezine bas­ta­dyq. 
Kenesaryny zerttegeni úshin tarıhshy-ǵa­lym Ermuhan Bekmahanuly 25 jylǵa aı­da­lyp ketti. Dál osyndaı pesany jazyp, sah­naǵa qoıǵany úshin uly Muhtar Áýezov túr­mege jabyldy. Al búgin osyndaı alyp­tardy emen-jarqyn sahnaǵa alyp shyǵyp, tarıhı muralarymyzǵa úńilip, óz án-kúıi­mizdi nasıhattaýǵa jol ashyldy. Bul – taǵy da uly Táýelsizdiktiń jemisi.
Qazaq halqy jarty ǵasyr buryn Qazaq han­dyǵynyń 500 jyldyǵyn toılaǵan joq. Aıtýly datany bilmedi emes, bildi. Biraq etek-jeńimizdi jınap, tek 550 jyldyǵy­myz­dy atap ótýge shamamyz kelip otyr. Bul – taǵy da Táýelsizdiktiń tartýy. Sondyqtan qo­ly­myz­daǵy barymyzdy baǵalaı bileıik. Qazaq­tyń egemendigin alyp berip, Táýel­sizdigin ja­rıalaǵan, ana tilin memlekettik til qata­ry­na qosqan Almaty qalasy búgin bar­shańyz­dy osyndaı óner jármeńkesinde kútý­ge daıyn, – dedi Mamaı Ahet. 
Budan keıin baıqaý úmitkerleri men qa­zy­lar alqasy tanystyrylyp, mártebeli meı­mandarǵa gúl shoqtary usynyldy.  
Reseı Federasıasynyń eńbek sińirgen ar­tısi, Bashqurtstannyń halyq artısi Ramıl Gaızýllın sybyzǵyda bashqurttyń halyq áýeni «Ǵylmıaza» jáne qazaqtyń halyq áni «Búldirgendi» oryndasa, Ystambul konser­va­torıasynyń profesory, kavalshy Jı­han Iýrchı Manarbek Erjanovtyń áni «Saıra bulbuldy» quıqyljytty. Qazylar alqasynyń tóraǵasy Bazarhan Qosbasarov óz kezeginde qatysýshylarǵa sát-sapar tiledi.  

– Qazaqtyń áni men kúıi – halqymyzdyń kóne zamannan qalyptasqan asyl qazynasy, ulttyń bekzat bolmysy, júrek syzdatqan sa­ǵynyshy, kóńildiń qylyn sherter sezimi men muń-sheri, qyzyq-qýanyshy. Bizde 5 myń­nan asa kúı, 12 myńǵa jýyq án bar eken. Bul – qazaq ánshilik jáne kúıshilik óneriniń san ǵasyrlyq tarıhynyń bar ekendiginiń birden-bir aıǵaǵy. Dombyrada, qobyzda, sybyzǵyda jáne taǵy basqa halyq aspap­ta­rynda oryndalǵan kúıler kemel quryly­my­men, kúrdeli yrǵaq ıirimderimen erekshe­le­nip, talaı ǵasyr súzgisinen ótip, búginge jet­­ti. 
Halqymyzdyń óner salasyndaǵy shoq­tyǵy bıik bir maqtanyshy – ulttyq mýzy­ka­lyq aspaptar. Ótken ǵasyrdyń 60-jyl­dary­nan bastap, qazaq mýzyka aspaptaryn zertteý, umyt bola bastaǵan túrlerin qaıta qalpyna keltirý jumystary qolǵa alyndy. Buryn-sońdy jas býyn tolyq bile bermeıtin, al qaı­sybiriniń aty emis-emis este qalǵan as­pap­tar qaıta tirilip, ónerden óziniń turaqty or­nyn tapty. Túrli ansámblder men or­kestr quramy da qaıta jańǵyrdy. Osy tur­­ǵyda qajyrly ǵalym, ónegeli ustaz, pro­fessor Bolat Shamǵalıuly Sarybaevtyń eń­beginiń zor ekenin aıtqymyz keledi. Ja­ryq­tyq, tiri bolǵanda ortamyzda otyryp, bú­gin­gi jastardyń sybyzǵyny, jetigendi, saz syr­naıdy, shańqobyzdy, sherterdi, adyr­nany qalaı meńgergenin kórer me edi?! Osy aspaptardyń ótken ǵasyrda oınaý máde­nıe­tiniń joǵary bolǵanyn, ózindik dástúrli ún qalyptastyrǵanyn aıtyp júrmiz. Myna bizder mýzykanyń mańynda júrgen keıbir adamdardan joǵaryda aıtylǵan aspaptardy «bulardyń bári eskirgen. Klasıkany oı­naýǵa kelmeıdi, sondyqtan epızodtyq túrde ǵana paıdalaný kerek» degen sózin estidik. Sóı­tip júrgende, halqymyzdyń talantty uly Nurǵısa Tilendıev «Otyrar sazy» or­kest­rinde osy sazsyrnaıdy, sybyzǵyny, qyl­qobyzdy, ishekti qobyzdy, jetigendi, sher­terdi, úrlemeli aspaptardy dombyramen, tórt ishekti qobyzben, baıanmen jarystyryp, úndestigin taba bildi. Oǵan aıǵaq – «Ma­ham­bet» poemasy, «Ata tolǵaýy», «Ańsaý» syndy taǵy basqa shyǵarmalary. Sol ujymnyń konsertine kirýge bılet taba almaı qalǵan halyqty kózimiz kórdi, qulaǵymyz estidi. Sol se­kildi, asyl muralarymyzdy, ulttyq úni­mizdi halqymyzdyń daryndy tulǵalary A.Jubanov, M.Tólebaev, S.Muhamedjanov, K.Kúmisbekov, M.Qoıshybaev sıaqty aǵala­ry­myz qaımaǵyn buzbaı, orkestrmen saı­rat­qany qulaǵymyzda tur. 
Festıváldiń maqsaty – ansámblderdiń jo­ǵaryda aıtqan asyl muralarymyzdy bú­gingi kúni qaı deńgeıde, qalaı iske asyryp júr? Qandaı jetistikterimiz bar, múlt ketip jat­qan tusymyz qaısy? Osy kemshilikterdi bir-birimizden kórip túzesek, úırensek degen nıet. Kóne aspaptardyń ansámbl quramyn­da óziniń ornyn kásibı túrde taba bilip, ha­lyq arasyna mura etip qaldyrsaq degen oı. Sóz sońynda aıtarym, bul konkýrs ha­lyq aspaptary ansámblderiniń toıy der edim. Toı toıǵa ulassyn, aǵaıyn! İske sát! – dedi Bazarhan Ábýuly.  
Kesh barysynda «Sazgen sazy» folk­lor­ly-etnografıalyq ansambli «Aspaptar sherýi» mýzykalyq kompozısıasyn, Qazaq­stan Jastar odaǵy «Serper» syılyǵynyń ıegeri Tamara Asar halyq áni «Jorǵataıdy», Qyrǵyzstannyń eńbek sińirgen artısi Ba­qytbek Shótenov qazaqtyń halyq áni «Ja­rıam-aıdaı» jáne qyrǵyzdyń halyq áni «Tú­simdeni», «El Kanto» toby qazaqtyń ha­lyq áni «Aýylyń seniń irgelini», Qazaq­stan­nyń halyq artısi Nurǵalı Núsipjanov Nur­ǵısa Tilendıevtiń áni «Alataýdy», T.Júr­genov atyndaǵy Qazaq ulttyq óner aka­demıasynyń stýdenti Gúlnur Kóshenova Edıt Pıaftyń repertýaryndaǵy «Men esh­teńege ókinbeımin» ánin, respýblıkalyq, ha­lyqaralyq konkýrstardyń júldegeri El­mıra Qashqymbaeva Sadyq Kárimbaevtyń áni «Jetisýdy» sazsyrnaıda tyńdarman nazaryna usyndy. Sonymen qatar Qazaq­stan­nyń halyq artısi Nurjamal Úsenbaeva ha­lyq áni «Alqońyrdy», Manarbek Erja­nov­tyń «Qýanamyn» ánin náshine keltire shyr­qady. Nurǵısa Tilendıevtiń «Jekpe-jek» kúıin Nurken Áshirov, Batyrjan Myq­tybaev, Beıbarys Hamzın, Dáýren Raev, Jańyl Buharova, Áıgerim Bekberdıeva, Symbat Álimbetovalar tartý etti. 

                                                            Ekinshi kún
Baıqaýdyń ekinshi kúni qasıetti Qurban aıt merekesimen tuspa-tus keldi. Soǵan qa­ra­mastan, qazylar alqasy baıqaýǵa qatysý­shy ansámblderdiń daıyndap kelgen shy­ǵar­masyn tańǵy toǵyzdan keshki toǵyzǵa deıin sarapqa saldy. Úmitkerlerdiń jas erek­sheligine shekteý qoıylmaǵandyqtan, syn­ǵa túskenderdiń arasynda mektep oqý­shylarynan bastap, halyq artıseri, esimi elge belgili eńbek sińirgen qaırat­ker­ler, qurylǵanyna kóp ýaqyt bola qoımaǵan jas ansámblder boı kórsetti. Alaıda, qazylar alqasy eshkimniń ataq-marapatyna, jasy men jolynyń úlkendigine qarap jatpady. Eń áýeli oryndaýshylardyń kásibı she­berligine, shyǵarmanyń mazmuny men kór­kemdik deńgeıine, ulttyq naqyshyna mán berdi. Ókinishke qaraı, daıyndyqtary ál­sizdeý, baıqaý sharttaryn jete túsinbegen ujymdar da kezdesip jatty. Degenmen, qazy­lar alqasynyń tóraǵasy Bazarhan Qosba­sarov baıqaýdyń óte tartysty túrde ótkenin aıtady. Qyryq ansámbldiń ishinen 11 laýreat tańdaý qıyn soqqan. Qýanarlyǵy, 2011 jylǵy festıválge qaraǵanda an­sambl­derdiń oryndaý máneri, aspapty meń­gerý deńgeıi anaǵurlym ósken. Mýzy­kant­tar­dyń shıraqtyǵy, sahnada ózderin emin-erkin ustaýy, halyqqa tartymdylyǵy konkýrs deńgeıine saı shyqqan. Ásirese, shet memleketterden kelgen qazylar alqasynyń músheleri qazaqtyń halyq aspaptarynyń áýezine qatty qyzyǵyp, tańdanystaryn jasyra almaǵan.  

Ózbekstannyń halyq artısi, dırıjer Farýh Sadyqov:
– Mundaı aýqymdy festıváldi saıası-eko­nomıkalyq jaǵdaıy turaqty el ǵana ótkize alady. Sondyqtan eń áýeli Pre­zı­dent­terińiz Nursultan Nazarbaevqa shynaıy alǵysymdy bildirgim keledi. Sondaı-aq Almaty qalasynyń ákimdigine, Mádenıet basqarmasyna, sharanyń uıymdastyrý­shy­laryna myń raqmet! Festıváldiń atyn «Ǵasyrlar sazy» dep qalaı taýyp qoıǵan­syzdar?! Qulaqqa da, júrekke de sondaı jaǵymdy, keremet estiledi. Bıyl ekinshi ret ótkenimen, halyqaralyq deńgeıde birinshi ret basymyzdy qosyp otyr. Birinshi ret bolsa da, on-on bes jyldyq tarıhy bar mý­zyka merekelerinen bir mysqal kem emes. Bas qalalaryńyz Astana jarqyrap, jaınaı bersin! Almaty óziniń talaılardy toǵystyr­ǵan mádenıet oshaǵy, rýhanı orta degen mártebesin saqtap qalypty. Qazaq halqy – án men kúıin saf qalpynda qasterlep kele jat­qan, qasıeti úzilmegen kemeńger el. Qur­manǵazynyń «Balbyraýynynyń» ózi nege turady?! Osy kúıdi estisem, qanym qyzyp, arqam qozady, – deıdi rızashylyǵyn úıip-t­ógip.
Laýreattar anyqtalyp, qazylar alqa­synyń jumysy aıaqtalǵan kezde Qazaq­stannyń eńbek sińirgen qaıratkeri, «Qurmet» ordeniniń ıegeri Jamaǵat Temirǵalıevtiń de pikirin suraǵan edik. 
– 2011 jyly ótken alǵashqy festıválde de qazylar alqasynyń múshesi boldym. Bi­rinshimen salystyrǵanda qatysýshylardyń daıyndyǵy óte joǵary deýge bolady. Óıt­keni keıingi kezde fólklorlyq an­sambl­derge óte qatty kóńil bólinip jatyr. Alǵash egemendik alǵan jyldary eki-úsh ansámbl bolsa, qazir shamamen alǵanda 30-35 kásibı ujym bar. Halyq aspaptary orkestrinen bólek barlyq oblystyq fılarmonıada, konserttik uıymdarda óner kórsetip júr. Repertýarlary ártúrli janrdaǵy shyǵarma­lardy qamtıdy. Halyq kúılerin, halyq kompozıtorlarynyń muralaryn, shetel kompozıtorlarynyń týyndylaryn emin-erkin meńgergen. Oryndaý sheberlikteri óte joǵary. Túrkıadan, Qyrǵyzstannan, Ózbek­stannan kelgen, ózimizdiń uıǵyr teatrynyń ansambli de tánti etti. Oblystaǵy, aýdandaǵy ansámblderdiń izdenisteri de myqty. Shet­eldikterden asyp ketpese, kem túsip turǵan joq. Qazylar alqasynda otyrǵan sheteldik ataq­ty dırıjerler, profesorlar bizben birge qatar otyryp tyńdady. Olardyń óz­deri aýyzdaryn ashyp, kózderin jumyp, «ke­remet eken» dep bas shaıqady. Ásirese, úsh-tórt adamnan quralǵan ansámblder qaıran qaldyrdy. Árqaısysy jeke-jeke bir­neshe aspapta oınaıdy. Bir mýzykant qobyzdy ǵana emes, shańqobyz, úskirik sıaqty taǵy birneshe fólklorlyq aspapty qosa tamyljytyp otyr. Urmaly aspap­tar­dyń túr-túrin meńgerip alǵan. Qonaq túgili, ózimiz rıza boldyq. Bolat Sarybaev zerttep, qa­tarǵa qosyp ketken kóne aspaptardyń da­myp, jetilgenine táýbe dedik. Ásirese, Asta­nadan, Soltústik Qazaqstannan kelgen ujym­dar saqadaı-saı daıyndalyp kelipti. Árı­ne, saıys bolǵannan keıin, biri ozdy, bi­ri qaldy. Qyryq ansámbldiń barlyǵyn birdeı laýreat atandyra almadyq. Kishkene kásibı deńgeıleri jetińkiremeı, oǵan ózderi rıza bolmaı, ókpelep ketkenderi de bar. De­genmen, álemge belgili, tájirıbeli  mýzy­kant­tar ádil sheshim shyǵardy dep esepteımin. Uıymdastyrýshylar Baǵdat Tilegenov, Yqylas Nurǵalıev, Murat Jalbyrovtar kúni-túni júgirip, jumys istedi. 500-den asa adamdy kútip alyp, ornalastyryp, sahnaǵa shyǵyp-túsýine deıin oılastyrý ońaı dúnıe emes. Úlken eńbekti, asqan jınaqylyqty qa­jet etedi. Aldaǵy ýaqytta da osy festı­val dástúrli túrde jalǵasyn taýyp, jylda bolmasa da eki-úsh jylda bir qaıtalanyp tursa degen oıdamyn. Bul bizdiń folk­lor­lyq ansámblderdiń dárejesin joǵarylatýǵa úlken áser eter edi. 

                                                     Úshinshi kún
Sonymen, úsh kúnge sozylǵan folk­lor­lyq aspaptar sherýi óz máresine jetti. Fes­tıvaldiń gala-konserti men jeńimpazdardy marapattaý rásimi Túrkeshtiń kúıi «Kóńila­shar­men» ashyldy. Oryndaǵan – laýreat atan­ǵan ujymdardan jınaqtalǵan orkestr. Dı­rıjeri – Jamaǵat Temirǵalıev. 
Mereıi ústem bolǵan túrik halyq aspap­tary ansambli Qurmanǵazynyń kúıi «Adaı­dy» laýreat atanǵan ujymdarmen birge oryn­dap, kópshiliktiń ystyq yqylasyna bó­lendi. Sondaı-aq Ózbekstannyń halyq ar­tısi Farýk Sadyqovtyń dırıjerligimen «Bal­byraýyn», Jalǵasbek Begendikovtiń dı­rıjerligimen «Saryarqa» kúıin de laý­reat­tar shalqytty. 
Reseı Federasıasynyń eńbek sińirgen artısi, Bashqurtstannyń halyq artısi Ramıl Gaı­zýllınmen tildeskenimizde, ol festı­val­den oljaly qaıtyp bara jatqanyn or­ta­ǵa saldy. 
– Osy basqosýǵa shaqyrǵan Baǵdat Tile­genov dosyma úlken alǵys aıtamyn. Biz bir-birimizdi 1992 jyldan tanımyz. Jarty Eýropany birge araladyq. Men – qýraıda, ol qobyzda oınady. Talaı konsertterde sah­naǵa birge shyqtyq. Festıválge sha­qyrǵan usynysyn qýana qabyl aldym. Almatyǵa birinshi ret kelip otyrǵan joqpyn. Bi­raq taǵy da kózimniń jetkeni, Qazaqstandy qat­ty jaqsy kóredi ekenmin. Qazaq halqyn, ulttyq mýzykasyn, áni men kúıin, ansámbl­derin, túrli kóne aspaptaryn, qonaqjaı­ly­ǵyn erekshe qadirleımin. Memleket basshysy Nursultan Nazarbaevqa, qala ákimi Baýyr­jan Baıbekke ystyq yqylasymdy, zor qur­metimdi jetkizgim keledi. Mýzyka mere­ke­sinen alǵan áserim ushan-teńiz. Eń bas­tysy, «Saryarqa», «Balbyraýyn», «Sary­jaılaý», «Adaı», «Kóńilashar» sıaqty kúı­lerdiń partıtýralaryn ózimmen birge alyp ketip baramyn. Barǵan soń ult aspap­tary orkestrine túsirip, oınatatyn bola­myn, – deıdi ol. Sondaı-aq Qyrǵyzstannyń halyq artısi, Qazaqstannyń eńbek sińirgen artısi Salamat Sadyqova:
– Kúı tartylyp, án shyrqalyp jatqan jer – eldiń qutyn, halyqtyń qasıetin sha­qy­rady. Úsh kúnnen beri bir-birimizdi syrt­tan baqylap, áriptesterimizdiń óner­lerin ta­mashalap jatyrmyz. «Balbyraýyn», «Sa­ry jaılaý» sıaqty qazaqtyń keremet klas­sıkalyq kúıleri rýh syılady. Osyndaı bas­qosýlar jıi bolyp turǵanyn qalaımyz. Jas­tar kóbirek kelipti, sol qýantty. Olarǵa festıváldiń bereri  – óz shama-sharqyn 
sú­z­giden ótkizedi. Qazir jer-jahanda túrli qaq­tyǵystar, soqtyǵystar oryn alyp jat­qa­nyn kórip, bilip otyrmyz. Ózgelerge qa­rap, osy kúnimizge táýbe aıtyp, shúkirshilik aı­typ júrgen ýaqyt. Sondyqtan eldiń se­zimin bir ǵana mýzyka oıatady, birlikke-yn­tymaqqa shaqyrady. Halyqaralyq fes­tı­valder kóbirek uıymdastyrylsa, nur ústine nur. Jalpy, kóńilimiz tolyp, qımastyq se­zimmen qaıtyp baramyz, – deıdi.

 "Qamshy" silteıdi