Qorǵanys mınıstrligi Qarjy naryǵyn retteý jáne damytý agenttigimen merzimdi qyzmettiń sarbazdaryna "nesıelik demalys" berý týraly memorandým bekitkenin habarlady.
Qorǵanys vedomstvosy bul bastama merzimdi qyzmettegi áskerı qyzmetshilerge áskerı qyzmet ótkerý kezeńinde nesıelerin umytýǵa múmkindik beretinin aıtady.
"Nesıeler boıynsha tólemderdi keıinge qaldyrý barlyq banktermen jáne mıkroqarjy uıymdarymen sarbazdardyń barlyq aqshalaı qaryzdaryn toqtata turý kózdeledi. Memorandýmdy iske asyrý úshin Qorǵanys mınıstrliginiń Agenttikpen jáne qarjy uıymdarymen ózara is-qımylynyń arnaıy algorıtmi ázirlendi. Osyǵan sáıkes, shaqyrý naýqany kezinde bolashaq Otan qorǵaýshylardyń jınalǵan banktik qaryzdary men shaǵyn nesıeleri týraly málimetter birden Qarjy naryǵyn retteý jáne damytý agenttigine jiberiletin bolady. Osy derekterdiń negizinde kredıtorlar negizgi borysh pen syıaqy boıynsha tólemderdi keıinge qaldyrý jáne bereshekti óndirip alýdyń barlyq nysandaryn toqtata turý máselelerin pysyqtaıdy. Tólemderdi keıinge qaldyrý kezeńinde kredıtor sotqa berýdi, bereshekti óndirip alý maqsatymen atqarýshylyq jazba jasaý úshin notarıýsqa júginýdi, turǵyn úıdi satýdy, qaryz alýshynyń otbasyn páterden shyǵarýdy toqtata turady. Sondaı-aq, sot aktilerine sáıkes kredıtor bereshekti óndirip alýdyń barlyq nysandaryn toqtatýǵa mindetteledi"delingen habarlamada.
Memorandým áskerı boryshyn ótep júrgenderdiń qaryzdary men shaǵyn nesıeleri boıynsha mindettemelerdi oryndaı almaýyna baılanysty týyndaıtyn áleýmettik shıelenisti joıýǵa yqpal etetin bolady dep kútilip otyr.
Pikir qaldyrý