Qarjylyq monıtorıń agenttiginiń málimetinshe, Mıhaıl Kozachkov Bolat Nazarbaevtyń oń qoly delinip júrgen Aıdos Kospaev degen azamattyń uıymdasqan qylmystyq tobyna reıderlik basyp alýlar jasaýǵa kómektesti degen kúdikke ilingen.
QMA jýrnalısi qoǵamdyq pikir qalyptastyrý arqyly qylmyskerlerge bolysty, aqparattyq shabýyl uıymdastyrdy, jalǵan málimet taratty, adam bedeline nuqsan keltiretin maqalalar jarıalady, memlekettik qupıaǵa jatatyn aqparattardy jınap, taratty dep aıyptap otyr. Organ dereginshe, jýrnalıs osy qyzmeti úshin qomaqty syıaqy alǵan.
Jýrnalısiń advokaty Anna Veretelnıkova kúdiktiniń úıin tintý kezinde prosedýralyq normalar saqtalmady, tintý advokat qatysýynsyz bolyp jatyr dep málimdegen. "Ádil sóz" baspasóz qorǵaý uıymy buǵan alańdaýshylyq bildirip, Qarjy monıtorıńi agenttigi taratqan aqparattyq habarlama kinásizdik prezýmpsıasyn saqtamaǵanyn, konstıtýsıanyń 77-babyna saı, "adamnyń kináliligi sottyń zańdy kúshine engen úkimimen tanylatynyn" atap ótti.
Mundaı pikirdi quqyqqorǵaýshy Lázzát Ahatova da bildirdi.
"Kináli bolsyn, kúnáli bolsyn, qylmysker bolsyn, resıdıvıs bolsyn, qylmystyq iske qatysty barlyq shara - qylmystyq zańnama normalarynan aýytqymaı, zań sheńberinde jasalýy kerek. Quqyqtyq, zaıyrly memleketimiz qaıda qaldy? Eldegi jaǵdaılardy Prezıdent bile me? Bizdi jalpy kim basqaryp otyr degen kúdik bar, kóńilde. Sońǵy kezde. Óıtkeni elde bolyp jatqan oqıǵalar bassyz, basshysyz, anarhıada júrgendeı áser etip jatyr" dedi advokat facebook paraqshasynda.
Qoǵam belsendileri men zańgerler áleýmettik jeli shýlaǵan soń uzamaı prezıdenttiń baspasóz hatshysy Rýslan Jeldibaı jýrnalıske qatysty is barysynda tirkelgen quqyqbuzýshylyqtar týraly habarǵa reaksıa tanytty.
"Bul is Qazaqstan Respýblıkasynyń zańnamasyna sáıkes tek quqyq sheńberinde qaralýǵa tıis ekenin atap ótý qajet. Bas prokýratýra tergeýdiń zańdylyǵyn qadaǵalaýdy qamtamasyz etýge jáne zańnamada belgilengen tártippen qajetti túsiniktemeler berýge mindetti. Qazaqstan azamaty retinde jýrnalısiń barlyq zańdy quqyǵy tolyq saqtalýǵa tıis" dedi Rýslan Jeldibaı.
Birqatar belsendi azamattar men Kozachkovtyń áriptesteri bolyp jatqan oqıǵany quqyqtyq sala, sot júıesi týraly ótkir jazatyn jýrnalısiń aýzyna qaqpaq bolý áreketi dep sanaıtynyn jetkizip, "mundaıdy Jańa Qazaqstanǵa jaraspaıtyn tirlik" degenge saıatyn pikir aıtyp jatyr.
Kozachkov buǵan deıin ózin UQK qyzmetkerleri ańdyp júrgenin, áldekimder kóligin syryp ketkenin habarlaǵan.
Jýrnalısiń ustalýy kópshilik kókeıinde aqparat salasynda sot júıesindegi zańsyzdyqpen batyl kúresip júrgendeı kórinetin Mıhaıl Kozachkovtyń ózi qylmysqa qatysy bar bolyp shyqty ma, álde QMA "Jańa Qazaqstanǵa" jaraspaıtyn tirlik istep otyr ma degendeı ekiudaı oı týdyrdy.
Pikir qaldyrý