Qazaqstannyń qarjy monıtorıńi agenttigi qamaýǵa alǵan jýrnalıs Mıhaıl Kozachkovtyń haty tarap jatyr. Ony jýrnalıs Vadım Boreıko facebook paraqshasyna jarıalady. 

Jýrnalıs hat mátinin áleýmettik jelidegi chattardan alǵanyn,alaıda advokattarǵa habarlasyp hat Kozachkovtiki ekenine kóz jetkizgenin aıtady.

Kozachkov hattyń basynda bir táýlikten astam ýaqyt boıy ózine taǵylǵan aıypty dáleldeı almaı jatqanyn jazady. 

"Osyǵan baılanysty men kýálik bere almaımyn. Kúni boıy advokattarmen tıisti sheshimdi kútip otyramyz. Qarjy monıtrıng agenttiginiń habarlamalary arqyly meni reıderlik jasady, uıymdasqan qylmystyq topqa qatysy bar, memlekettik qupıany taratty dep aıyptap otyrǵanyn túsindim" deıdi jýrnalıs. 

Kozachkov maqalasyndaǵy málemetterdi ashyq derekkózderden alatynyn, qupıa derekter bazasyn ashpaǵanyn atap ótken.

"Reıderlik" pen "uıymdasqan qylmystyq top" degeni – "Esentaı sıtı" men ózge de nysandar tóńiregindegi aty shýly is. Meniń túsinýimshe meniń "qylmysym" – "jymqyrdy" dep aıyptalǵan Almas Ábdiǵapparov týraly maqala jazǵanym. Restorator mıllıon dollar kólemindegi qarjyny jymqyrǵan. Bul tergeý kezinde de, sot arqyly da dáleldengen. Alaıda prokýror men sýdıa eshqaısysyn reıderlik jasady dep aıyptamaıdy. Alaıda osy máselege qatysty maqala jazǵan jýrnalısi tutqyndaıdy" delingen hatta.

Jýrnalıs ustalýyn qarjy monıtorıńi agenttiginiń tóraǵasy Janat Elımanovtyń jeke basyna degen óshpendiligimen baılanystyrady. Kozachkovtyń aıtýynsha, jazda Janat Elımanov ózine óshtesip júrgenin, qamaý týraly oıy baryn estigen.

"Agenttik qyzmetkeri qarjy monıtorıń agenttiginiń jumysyna kedergi keltirip júrgendikten meni qamaýǵa alǵysy keletinin aıtqan edi. Al qarasha aıynda bıznesmen Gadjı Gadjıev Elımanovtyń meni tutqyndaýy múmkin ekenin eskertti. Onyń aıtýynsha, Elımanovqa onyń áıeline qatysty jazǵan maqalam unamapty. Iá men qarjy pıramıdasynyń qurbanyna aınalǵan Elımanovtyń áıeli jóninde maqala jazǵanmyn. Men Gadjıge olardyń isin jazýymdy ótingen basqa jábirlenýshiniń hatyn kórsettim. Maǵan qarjylyq qylmysqa qarsy basty kúreskerdiń áıeli qarjy pıramıdasynyń klıenti bolǵany oǵash kórindi. Sol úshin de jazdym. Al Janat Elımanov soǵan renjip qalǵanǵa uqsaıdy" deıdi Kozachkov. 

Bıznesmen Gadjıev agenttik tóraǵasymen sóılesýge ýáde bergen. Biraq Kozachkov ol úshin maqalaǵa túsinikteme jasap, jazba jarıalaýǵa mindettelgen. Kozachkov usynystan bas tartqan. 

"Men buǵan deıin kóptegen qylmystyq oqıǵalar jóninde jazdym. Alaıda buǵan men kináli emespin. Men tek ańqaý bolǵanym úshin, qańtar oqıǵasynan keıin jańa ári ádiletti Qazaqstan qurylatynyna sengenim úshin kinálimin" dep jazǵan jýrnalıs. 

Budan bólek jýrnalıs tapsyryspen maqala jazyp, 52 mln teńge alǵany jónindegi aqparatty joqqa shyǵardy. 

"Men aıyptaýlardan qoryqpaımyn. Men alǵan mıllıondardy kórsetýińizdi suraımyn. Bul aıyptar sotta búkil halyqtyń aldynda qalaı dáleldenetinin kóreıik", deıdi Mıhaıl Kozachkov.

QMA jýrnalısi qoǵamdyq pikir qalyptastyrý arqyly qylmyskerlerge bolysty, aqparattyq shabýyl uıymdastyrdy, jalǵan málimet taratty, adam bedeline nuqsan keltiretin maqalalar jarıalady, memlekettik qupıaǵa jatatyn aqparattardy jınap, taratty dep aıyptap otyr. Organ dereginshe, jýrnalıs osy qyzmeti úshin qomaqty syıaqy alǵan.

Birqatar belsendi azamattar men Kozachkovtyń áriptesteri bolyp jatqan oqıǵany quqyqtyq sala, sot júıesi týraly ótkir jazatyn jýrnalısiń aýzyna qaqpaq bolý áreketi dep sanaıdy.