Májilistegi «Aq jol» partıasynyń depýtattary Alash Respýblıkasynyń qurylǵan kúni 12 jeltoqsandy «Alash kúni» dep resmı belgilep, jyl saıyn memlekettik deńgeıde atap ótý týraly bastama kóterip, premer-mınıstr Álıhan Smaıylovqa saýal joldady.
«Qazaq handyǵy 1847 jyly memleket retinde tarıh sahnasynan ketkennen keıin araǵa týra 70 jyl salyp, 1917 jyldyń jeltoqsanynda sol Qazaq handyǵynyń jer aýmaǵynda Alash ult-azattyq qozǵalysy zamanaýı Qazaq ulttyq memleketiniń irgetasyn qaıta kóterip, osy jyldyń 5-12 jeltoqsanynda Orynbor qalasynda ótken Ekinshi jalpyulttyq qazaq-qyrǵyz quryltaıynda Alash orda ulttyq keńesin jasaqtap, úsh balamaly úmitkerdiń ishinen (Aıdarhan Turlybaıuly, Baqytgereı Qulmanuly) kópshilik daýyspen Alash Respýblıkasy úkimetiniń tóraǵasy bolyp Álıhan Bókeıhanov saılandy. Bul týraly Álimhan Ermekov «Saryarqa» gazetiniń 1918 jylǵy 22 qańtardaǵy sanynda: «...Alty alashtyń balasynyń basyna aq orda tigilip, Alash týy kóterildi...» dep jazǵan bolatyn. İs júzinde handyq úlgidegi ydyrap ketken Qazaq memlekettiligin qaıta jańǵyrtýda, ıaǵnı, búgingi táýelsizdiktiń negizin qalaýda jıyrmasynshy ǵasyrdyń basynda zamanaýı Qazaq memleketin qurýǵa umtylys jasap, bilim men qajyr-qaıratyn salyp, osy jolda shahıd bolǵan Ult kósemderiniń, Alash Respýblıkasy arystarynyń rolin erekshe atap ótýimiz kerek» dedi depýtat Berik Dúısembınov.
Depýtattyń aıtýynsha, 29 maýsymda «Aq jol» fraksıasy bul datany memlekettik deńgeıde atap ótýdi talap etken depýtattyq saýal joldap, alaıda tarıhı data ataýsyz qalǵan.
«Búginde tarıhı ádildikti ornatatyn kún jetti dep sanaımyz. Qurmetti Álıhan Asqanuly! Tarıh taǵylymyn urpaqqa nasıhattaý maqsatynda «Aq jol» fraksıasy Alashtanýshy ǵalymdardyń bastamasyn qoldaı otyryp, Táýelsizdik kúniniń qarsańyndaǵy 12 jeltoqsandy – tarıhı qujattarmen dáleldengen Alash Respýblıkasynyń qurylǵan kúni retinde – «Alash kúni» dep resmı belgileýdi jáne jyl saıyn memlekettik deńgeıde atap ótýdi suraıdy» delingen depýtattyq saýaldy.
Pikir qaldyrý