Reseı Qorǵanys mınıstri Sergeı Shoıgý áskerge shaqyrý jasyn kezeń kezeńmen ulǵaıtýdy usyndy, dep jazady kommersant.ru portaly.

Ol áskerge shaqyrý jasyn 18-den 21-ge deıin, shaqyrýdyń shekti jasyn 27-den 30-ǵa deıin kóterý arqyly Reseı áskeriniń sanyn 1,5 mıllıonǵa deıin arttyrý kózdelip otyrǵanyn jetkizdi. Onyń 695 myńy kelisim-shart negizinde qyzmet etetin áskerıler bolady.

Shoıgý mundaı shara NATO kúshteriniń el shekarasynyń soltústik-batys shaǵyna tóne túsýimen baılanysty ekenin aıtady.

Ol kelisim-shartpen qyzmet etetin áskerıler sanyn jyl sońyna deıin 521 myńǵa jetkizýdi tapsyrdy.

Budan bólek Shoıgý Máskeý jáne Lenıngrad áskerı okrýg pen jańa eki dıvızıa qurýdy usyndy.

Qazirgi ýaqytta Reseıde áskerge 18-27 jas aralyǵyndaǵy er adamdar shaqyrylady. Qyzmet merzimi bir jyldy quraıdy.

Resmı Kıev ózine qarsy basqynshylyq soǵys júrgizip jatqan Reseı úlken shyǵynǵa ushyrap jatqanyn aıtady. Máskeý keltirgen derekterde áskerı shyǵyn kólemi Ýkraına derekterinen áldeqaıda az. Beıtarap derekkózder soǵys jaǵdaıynda qos taraptyń da aıtqandaryn naqty anyqtaı almaı otyr. Alaıda qyrkúıekte Reseıde ishinara mobılızasıa jarıalanyp, resmı túrde 300 myńnan astam adam áskerge alynǵan.