Bas prokýratýra 2012 jyly "Arqankergen" shekara beketinde 15 adamdy óltirdi degen aıyppen sottalǵan Vladıslav Chelahtyń ótinishi qosymsha zertteletinin málimdedi.

"Ótinish Bas prokýratýraǵa tústi. Qosymsha zertteımiz, sebebi is on jyl burynǵy. Qajet bolsa, odan jaýap alynady", dedi Táshimbaev Bas prokýratýrada ótken brıfıńte.

Buǵan deıin Azattyq radıosy Vladıslav Chelah "Arqankergen" beketindegi 15 adamnyń ólimine qatysty jaǵdaıdy túsindirýge daıyn ekenin málimdep, prezıdent Q.Toqaevqa hat jazǵanyn habarlady. Ol hatta "jasamaǵan qylmysy úshin" ómir boıyna qamalǵanyn jáne shekara beketine shabýyl bolǵanyn aıtqan. Chelahtyń týystary hatty elektrondy túrde prezıdent atyna joldap, hat qańtarda qaralady degen jaýap alǵan.