Memleket basshysynyń tapsyrmasy aıasynda elordada ónerkásip sektoryn damytýǵa erekshe kóńil bólinedi. 2022 jyldyń 11 aıynda osy saladaǵy óndiris kólemi 1,6 trln. teńge, dep habarlady qala ákimdiginiń resmı saıty.

Jalpy kólemi 1,6 trln teńgeniń óńdeý ónerkásibindegi óndiris úlesi 1,5 trln teńgege jetti, bul salaǵa 25,1 mlrd.teńge ınvestısıalandy. Bul týraly onlaın-brıfıng barysynda Astana ákiminiń orynbasary Erlan Bekmurzaev málimdedi.

"Buǵan deıin biz JÓÓ-degi óńdeý ónerkásibi úlesiniń deńgeıin 2025 jylǵa qaraı 10% - ǵa deıin jetkizý mindetin qoıdyq, bul rette qazir birinshi jartyjyldyqtyń qorytyndysy boıynsha onyń úlesi 9,4% quraıdy. Elordada iri jobalardy iske asyrý úshin barlyq baza qalyptastyryldy. Mysaly, bizde barlyq ınjenerlik jelileri bar daıyn alańdy qamtıtyn №1 Indýstrıalyq park jumys isteıdi. Indýstrıalyq parktiń ónerkásiptik obektileriniń ınvestısıalyq portfeli 94 jobany quraıdy, olardyń jalpy quny 250 mlrd teńge bolatyn 185 mlrd teńgege jýyq ınvestısıalanǵan, onyń 50 - i paıdalanýǵa berilgen, 44 joba iske asyrýdyń ártúrli kezeńderinde" dep habarlady spıker.

Indýstrıalyq park qurylǵan sátten bastap óndiris kólemi 4,7 trln teńgege, eksport – 94 mlrd teńgege, salyq aýdarymdary – 154 mlrd teńgege jetti.

Úsh jyl ishinde saıabaq aýmaǵynda jalpy ınvestısıa somasy 45 mlrd teńgeden asatyn 15 joba iske qosyldy. Aǵymdaǵy jyldyń basynan bastap úsh zaýyt paıdalanýǵa berildi, kelesi aptada 600-den astam jumys ornyn qurýmen 23,7 mlrd teńgeden astam somaǵa taǵy eki jobanyń iske qosylýyn kútemiz.

Elorda ákiminiń orynbasarynyń aıtýynsha, saıabaqtyń arqasynda qurylys ındýstrıasy salasyn ártaraptandyrýǵa múmkindik týdy.

"Shar Qurylys úı qurylysy kombınatynyń jumysyn qaıta bastady jáne jyldyq qýaty 350 myń sharshy metr bolatyn óndiris jelisin keńeıtti. BI-Group kompanıasy blok-modýldi úı qurylysy kombınatyn iske qosty. "Sensata Group" qýaty jylyna 150 myń tekshe metr gaz bloktaryn shyǵaratyn zaýyt salyp jatyr. G-Park jáne NAK sıaqty iri kompanıalar qurylys materıaldaryn óndirý boıynsha jobalardy júzege asyrý boıynsha jumystar júrgizýde. Bul jobalar áleýmettik turǵyn úıdi iske qosý kórsetkishteri men ınvestısıa kóleminiń ósýin qamtamasyz etedi", - dep túsindirdi Bekmýrzaev.

Búgingi tańda №1 ındýstrıaldy park qazir tolyp tur. Bólingen búdjet qarajaty salynǵan ınvestısıalar esebinen 6,6 ese salyq túrinde óteldi.

Qazir osyndaı ekinshi saıabaqty qurý jumystary júrgizilýde. Onyń aýmaǵy 433 gektardy quraıdy.

Saıabaqty 10 negizgi klasterge bólý josparlanýda: mashına jasaý, qurylys ındýstrıasy, aǵash óńdeý, metalýrgıa, jeńil, hımıa jáne tamaq ónerkásibi, farmasevtıka, akt, sondaı-aq daıyn óndiristik úı-jaılar. Munda 150-den astam ınvestısıalyq joba ornalastyrylady.