Ýkraına prezıdenti Vladımır Zelenskıı AQSH-qa jasaǵan sapary kezinde kongres otyrysyna qatysty. Zelenskıı AQSH-tyń Reseı áskerine qarsy kúresi men Ýkraınaǵa jasaǵan kómegin qaıyrymdylyq emes, álemdik qaýipsizdikti saqtaý úshin jasalǵan ınvestısıa dep baǵalaıtynyn atap ótti, dep jazady Reuters.

"Men úshin AQSH-tyń kongresine qatysý, sizderdiń jáne búkil amerıkalyqtardyń aldynda sóz sóıleý – úlken abyroı. Barlyq qıyndyqtarǵa qaramastan Ýkraına qulaǵan joq. Ýkraına din aman", – dedi Zelenskıı.

Kongreske qatysqan sheneýnikter men senatorlar Zelenskııge qoldaý bildirip, qol soǵý úshin birneshe ret oryndarynan turdy. Mysaly, prezıdenttiń "Ýkraına sońyna deıin shekarasy úshin kúresip, eshqashan berilmeıdi" dep aıtqan sózi jáne qazirgi soǵysty ekinshi dúnıejúzilik soǵyspen salystyrýy qatysýshylardy qatty áserlendirdi.

Reuters agenttiginiń habarlaýynsha, aldaǵy ýaqytta beıbit kelissózderdiń nyshany baıqalmaıdy. Reseı de, Ýkraına da soǵysty jalǵastyrýǵa daıyn ekenin málim etken.

Vladımır Zelenskıı Djo Baıdenmen 10 tarmaqtan turatyn ýkraınalyq "beıbitshilik formýlasyn" talqylaǵanyn jetkizdi. 

"Baıden bizdiń beıbitshilik jónindegi bastamamyzdy qoldap jatqanyna qýanyshtymyn. Bul jıyndaǵy árbir qatysýshy bastamaǵa úlesin qosa alady", dedi Ýkraına prezıdenti. 

Vladımır Zelenskıı kongreste Ýkraınaǵa ekijaqty qoldaýdyń aldaǵy ýaqytta da jalǵasatynyna úmitti ekenin aıtyp ótti.