Otshashýlar kez kelgen merekeniń sánin qyzdyrary sózsiz. Alaıda onyń da qoldaný erejeleri bar jáne ony kele jatqan merekede eskergen jón. Medısına qyzmetkerleriniń usynǵan deregine súıensek, jylda Jańa jyl túninde 20-30-ǵa jýyq adam dál sol pırotehnıkany qoldaný kezinde jaraqat alyp, aýrýhanaǵa túsedi, dep habarlaıdy Almaty.tv tilshisi.

Balasynyń amandaǵyn tilegen ata-analar otshashýlardyń satylymyn erekshe baqylaýǵa alý keregin aıtady. Sebebi pırotehnıka saýdasymen aınalysatyndar balalardyń jasyna da mán bermeı, suraǵanyn qolyna ustata salady deıdi.

«Pırotehnıka turmaq úıdegi turmystyq tehnıka zattarynyń qaýipsizdigine kúmán keltiretin bolyp jatyrmyz ǵoı. Pırotehnıkanyń kesirinen qansha adam kúıik shalý bólimshesine túsip jatady. Sondyqtan da qarsymyz oǵan», – dedi ata-ana Gúlderaı Áýezbek.

Daýryqqan ata-analardyń sózin medısına qyzmetkerleri de joqqa shyǵarmady. Olardyń aıtýynsha, mereke kezinde denesin kúıik shalǵan naýqas sany artady.

«Olar qolynda qalaı jarylyp ketkenin túsinbeı qalady. Bir-birimen oınap, kıiminiń astyna laqtyryp jatady. Pırotehnıkadan túsken jaraqatalǵandar sany jyldan-jylǵa kóbeıip jatyr. Alataý, Jetisý aýdanynda kóp», – dedi Balalar shuǵyl medısınalyq kómek kórsetý ortalyǵy kúıik bólimshesiniń meńgerýshisi

Al tótenshe jaǵdaılar departamentiniń mamandarynyń aıtýynsha, pırotehnıka qaýpinen saqtaný úshin qaýipsizdik erejesinen bólek, satyp alý kezinde taýardyń sapasyna nazar aýdarǵan abzal. Sebebi jaıma bazarlarda, ásirese mereke qarsańynda, merzimi men normasy erejege saı kelmeıtin otshashýlar sany kúrt artatyn kórinedi.

«Ótken jyldyń jańa jyldyq merekelerinde pırotehnıkalyq buıymdarmen abaısyzda jumys isteýdiń nátıjesinde medısına mekemesine 39 adam, onyń ishinde 29 bala kómekke júgindi. 8 adam aýrýhanaǵa jatqyzyldy, olardyń arasynda 7 bala bar», – dedi Áýezov aýdandyq TJB aǵa ınjeneri Islambek Baıgelov

Tótenshe jaǵdaılar mınıstrliginiń málimetinshe, pırotehnıkalyq zattardy durys qoldanbaý saldarynan, 31 jeltoqsan men 5 qańtar aralyǵynda, elimizdiń iri qalalarynda orta eseppen alǵanda úsh órt oqıǵasy tirkelgen. Sondaı-aq árbir oblys ortalyǵynda statısıka boıynsha, 3-5 adam túrli kúıik jaraqatyn alady. Tótenshelikterdiń aıtýynsha, qys mezgilindegi órttiń 20 paıyzy pırotehnıkalyq zattardy paıdalaný kezinde tutanyp jatady. Al oǵan taýardyń tıisti normaǵa sáıkes kelmeýi, erejeniń saqtalmaýy syndy derekter sebep bolady. Sondyqtan qutqarýshylar otshashýdy satyp alarda satýshydan anyqtama talap etip, muqıat bolýǵa shaqyrady.