Májiliste Qańtar oqıǵasyn tergeý barysy týraly qoǵamdyq tyńdaý ótedi. Bul týraly palata tóraǵasy Erlan Qoshanov málim etti.

"Qańtar oqıǵasyna" týra bir jyl tolyp otyr. Bul jaǵdaı elimiz úshin táýelsizdik jyldaryndaǵy eń aýyr synaq boldy. Qańtardaǵy qaıǵyly oqıǵalardyń jarasy da, saldary da jeńil bolǵan joq. Sondyqtan, halqymyz da, qoǵam da ol týraly jan jaqty ári ashyq aqparat alǵysy keledi. Memlekettiń ózi soǵan múddeli. Sebebi, Prezıdent aıtqandaı, halyqtan jasyratyn eshteńe bolmaýy tıis, qoǵam shyndyqqa kóz jetkizýi kerek. Osy rette, Parlament Májilisi bolǵan oqıǵanyń mán-jaıyn, tergep-tekserý barysyn únemi baqylaýda ustap kele jatqanyn bilesizder. Ótken jyly memlekettik jáne quqyq qorǵaý organdarymen birge ashyq talqylaýlar ótkizdik. Sol talqylaýlar barysynda biraz máselege naqty jaýap berildi. Degenmen, el arasynda Qańtarǵa qatysty áli de suraqtar jetkilikti. Ótken bir jyldyń ishinde qoǵamda túrli pikirler, qıly qaýesetter taraýmen boldy. Sondyqtan, osy bir jyldyń ishinde júrgizilgen tergeý amaldarynyń nátıjelerin ashyq jarıalaý úshin, 2023 jylǵy 5 qańtarda Májilis qabyrǵasynda arnaıy tyńdaý ótedi" dedi Qoshanov Facebook paraqshasynda.

Májilis tóraǵasynyń sózinshe, tyńdaýda Bas prokýror men quqyq qorǵaý organdary basshylary esep beredi. Qoǵam belsendileri, BAQ ókilderi qatysady.

Arnaıy otyrys respýblıkalyq «Habar 24» telearnasynda jáne Májilistiń saıtynda, áleýmettik jelilerdegi resmı paraqshalarynda tikeleı efırde kórsetiledi.