Bas prokýror Berik Asylov "Dıkıı Arman" laqap atymen tanymal krımınal-avtorıtet Arman Jumageldıev qańtar oqıǵasynda UQK kýratorynyń basshylyǵymen áreket etkenin rastady.

"Arman Jumageldıev qala ishinde tártipsizdik ornatyp, narazylyqqa shyqqandardy baqylaýyna alǵysy keldi. Sondaı-aq bılikke birneshe últımatýmdyq talaptar qoıý úshin "halyq keńesin" qurýdy josparlady. Oǵan Almaty qalasy máslıhatynyń burynǵy depýtaty (Qaırat Qudaıbergen - red) men Almatydaǵy "Qazaqstan" qonaqúıine uıymdasqan túrde kelgen bandıtterdi qarýlandyrǵan krımınaldyq toptyń múshesi Mahatov belsendi kómektesken. Alaıda onyń jospary júzege aspady. Halyq oǵan baǵynbady. UQK-nyń burynǵy tóraǵasy ustalǵany týraly aqparat alǵannan keıin, senimdi alıbı jasaý maqsatynda maroderlerge qarsy kúres degen jeleýmen qala turǵyndaryna shabýyl jasaý tapsyryldy", dedi Berik Asylov májiliste qańtar oqıǵasyn tergeý barysy týraly baıandamasynda.

Bas prokýrordyń málimetinshe, "Dıkıı Arman" ózin kinásiz etip kórsetý úshin 6 qańtarda qalanyń ár jerinen 24 azamatty uryp, soǵyp "Ritz Carlton" jáne "Qazaqstan" qonaq úıiniń kólik turaqtarynda qamaýda ustaǵan. 

"Keıin ustalǵan azamattardy qala shetindegi konteınerge jetkizip, UQK qyzmetkerleriniń qarýly kúzetimen qamaýda ustaǵan. Sodan soń olar áýejaıǵa jetkizildi. Ustalǵandardyń biri Ótepbaev esimdi azamat azaptaý men uryp-soǵý kezinde qaza tapqan. Qazir atalǵan derekter boıynsha tergeý aıaqtaldy", dedi bas prokýror.

Berik Asylov keltirgen derekterdi osydan 3 aı buryn qazir qamaýda otyrǵan jýrnalıs Mıhaıl Kozachkov qolyna túsken qujattar negizinde jarıalaǵan bolatyn. Ol Jumageldıev ulttyq qaýipsizdik komıteti besinshi departamentiniń jetekshisi Rýslan Ysqaqovtyń baqylaýymen qyzmetin júzege asyrǵanyn aıtqan.