Ánshi Mádına Sádýaqasovanyń resmı neke qıý rásimi 2 aqpan kúni Almatydaǵy ortalyq AHAJ bóliminde boldy. Buǵan deıin buqaralyq aqparat quraldarynda 2014 jyldyń 8 qańtarynda Mádına Sádýaqasova men "Habar" telearnasynyń rejıseri Oljas Smaǵulov qupıa túrde nekelerin zańdastyrdy degen aqparattar taraǵan bolatyn. Eki jastyń toıy Almatydaǵy meıramhanalardyń birinde ótti. Qazaq estradasyndaǵy sulý da symbatty ánshi Mádına Sádýaqasova úılený toıynda eki kóılek kıdi. Onyń birin óziniń jaqyn dosy, jeke dızaıneri tikken eken. Toıǵa jas jubaılardyń dostary, týystary, áriptesteri, barlyǵy 300-deı adam jınaldy. "Oljas turmysqa shyǵý týraly usynysty maǵan qyrkúıek aıynda meniń týǵan kúnimde jasaǵan bolatyn. Ol meni meıramhanaǵa aparyp, gúl, iPhone jáne ústinde neke saqınasy bar tort syılady. Men, árıne, kelisimimdi berdim. Úılený toıymyzdy 2 aqpan kúni Oljastyń týǵan kúninde ótkizemiz dep sheshken edik",– dedi Mádına Sádýaqasova. Mádına óziniń bolashaq kúıeýimen osydan tórt jyl buryn "Tań qalmańyz" baǵdarlamasynyń túsirilimi kezinde tanysqan. Ol kezde Oljas Smaǵulov rejıserdiń kómekshisi bolyp qyzmet atqarǵan. Oljas belgili jazýshy Qabdesh Jumadilovtyń nemeresi. Kúıeý jigit Mádınadan 6 jas kishi. Mádına turmysqa shyqqan soń tegin aýystyrmaýǵa sheshim qabyldapty. Estrada juldyzynyń bul ekinshi ret turmysqa shyǵýy. Birinshi kúıeýimen ol bir jarym jyldaı otasyp, 2008 jyly resmı túrde ajyrasqan bolatyn. Mádına Sádýaqasova 1999 jylǵy "Jas qanat" jastar baıqaýynyń jeńimpazy, ol prezıdent orkestriniń jáne "Gúlder" ansambiliniń ánshisi bolyp jumys istedi. Taıaýda ótken "Qazaqstan daýysy" baıqaýynda tálimger boldy.