QR Parlament Senaty apparatynyń burynǵy jetekshisi Erjan Ótembaev adam jaldap jáne aldyn ala sóz baılasyp kisi óltirýge járdem bergeni úshin aıypty dep tanyldy.

"Sot Ótembaevty kináli dep taýyp, múlkin tárkileýmen birge qatań rejımdegi túzeý kolonıasynda 13 jyl jaza óteýge sottaý týraly úkim shyǵardy. Jaza óteý merzimi 2006 jyldyń 22 aqpanynan bastap esepteledi. "Tutqyndaý" bultartpaý sharasy ózgerissiz qalsyn. Sot sheshimine joǵarǵy ınstansıalarda shaǵym keltirilýi múmkin", - dedi sýdıa.

Sot Ótembaev kisi óltirýge adam jaldaýǵa jáne aldyn ala sóz baılasýǵa járdemdesti degen joramal rastaldy. Aıyptalýshy óz kinásin moıyndamasa da, onyń kinási aıǵaqtarmen, basqa da zertteýlermen dáleldendi. 2006 jyly óziniń kúdikti retindegi jaýabynda Ótembaev Ibragımovpen tanysýynyń mán-jaıyn tolyq túsindirdi. Sol jylǵy jaýaptarynda Sársenbaevty óltirý nıeti bolǵanyn da óz sózimen rastady. Ol Ibragımovten Sársenbaevty uryp-soǵýdy uıymdastyrýdy suraǵan", - deıdi sýdıa.

Sonymen birge, sot QR Bas prokýratýrasynyń nazaryna Rahat Álıev pen Álnur Musaevtyń osy qylmysqa qatysy baryn jetkizý týraly jeke qaýly shyǵardy.

Erjan Ótembaev 2006 jyly 20 jylǵa sottalǵan bolatyn. Ol Sársenbaevty jáne onyń eki kómekshisin óltirýge tapsyrys berdi dep aıyptaldy. 2013 jyldyń jeltoqsan aıynda qylmysqa qatysty jańa derekterdiń paıda bolýyna baılanysty onyń isi qaıta qaraldy. Ibragımov saıasatkerdi óltirýge Ótembaev emes, Álıev pen Musaev tapsyrys bergenin, sonyń ishinde, operasıany Musaev jeke baqylaýyna alǵanyn sotta rastady. Onyń aıtýynsha, Ótembaev sol kezdegi jaǵdaıdyń qurbany ǵana boldy. Degenmen is materıaldaryna qaraǵanda, Ótembaev buǵan deıin Ibragımovke oppozısıonerdi uryp-soǵý týraly josparyn aıtqan bolyp shyqty, muny bilgen Álıev pen Musaev jospardy ózgertken. Sársenbaev pen onyń eki kómekshisiniń óliminen soń kiná Ótembaevqa aýdy.

tengrinews.kz