Budan bylaı memlekettik buqaralyq aqparat quraldarynyń din taqyrybyndaǵy materıaldary Din isteri jónindegi agenttikpen kelisilip baryp jarıalanatyn bolady.

"Barlyq beınematerıal men qujattyq ónim, sondaı-aq búginnen bastap, telearnalardan shyǵatyn barlyq habarlar bizben kelisilip baryp jarıalanady, óıtkeni bul jerde áńgime ıdeologıa týraly bolyp otyr. Sondyqtan biz taratatyn habarlar, aıtatyn áńgimeler, biz derekti fılmder men telebaǵdarlamalar, beıneónimder arqyly jetkizetin málimetter ortalyqtan kelisilgen bolýy tıis", - deıdi Din isteri jónindegi agenttiktiń tóraǵasy Marat Ázilhanov vedomstvonyń alqa májilisinde.

Degenmen Agenttik basshysynyń orynbasary Ǵalym Shoıkın bul talap tek memlekettik tapsyrys boıynsha jasalatyn materıaldarǵa qatysty ekenin atap ótti. "Biz memlekettik aqparattyq tapsyrys sheńberinde memlekettiń qarjysyna jasalatyn materıaldarǵa qatysty osyndaı jumys júrgiziletinin aıtyp otyrmyz. Osy oraıda memlekettik tapsyrys boıynsha materıal ázirleıtin barlyq memlekettik BAQ memlekettik saıasat ıdeologıasyna saı áreket etýi tıis", - dedi Shoıkın.

Agenttik basshylary halyq arasyna taratylatyn túsindirý jadynamalarynyń da osylaı muqıat tekseriletinin aıtty. "Mundaı materıaldardy asqan naqtylyqpen jáne salystyryla tekserilgen kúıde jasaý qajet. Biz din uǵymymen baılanysty 200 túrli kitapshany taldap shyqtyq, qazir halyqqa arnalǵan árbir ónimniń bizdiń ǵylymı-ádistemelik keńestiń talqylaýynan ótpeı taratylmaýyn qatań qadaǵalaý kerek dep uıǵaryp otyrmyz. Árıne, ókinishke qaraı, ketip qalǵan qatelikter bar", - dedi Din isteri jónindegi agenttiktiń tóraǵasy.

tengrinews.kz