Pákistannyń Peshevar qalasyndaǵy meshittegi jarylystan 28 adam qaza tapty. Al zardap shekkenderdiń sany 150-den asqan. Qaıǵyly oqıǵa kópshilik besin namazyn oqyp jatqan kezde bolǵan. Sol sátte meshitte shamamen 260 adam qulshylyq jasap jatqan.

"Aýrýhana ókili jarylys saldarynan 28 adam qaza tapqanyn, 150-den astam jaralanǵan turǵyn aýrýhanaǵa jetkizilgenin aıtty. Dárigerlerdiń sózinshe, zardap shekken 10-nan astam adamnyń jaǵdaıy aýyr", dep habarlady  Geo News arnasy. 

Meshit jergilikti polısıa shtab-páteri men terorızmge qarsy kúres bólimshesine jaqyn ornalasqan. Qaza tapqandardyń kóbi polısıa qyzmetkerleri. 

Jankeshti meshitte namaz oqylyp jatqan kezde aldyńǵy qatarda turyp, ózin jaryp jibergen. Jergilikti polısıa ǵımarattyń jartysy qırap qalǵanyn málimdedi. Qırandy astynda qalǵan adamdardy qutqarý jumystary áli júrip jatyr. 

Ázirge teraktini eshqandaı uıym moınyna almady.