Túrkıada qazaqstandyq IT maman Mırýs Qurmashev joǵalyp ketti. Bul týraly Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın málim etti.
Mırýs Qurmashev Astana Hub ókili, VT Mırýs kompanıasynyń ıesi. Ol zilzala bolǵan ýaqytta Hataı qalasynda bolǵan. Jer silkinisinen keıin baılanysqa shyqpaǵan.
“Almatydaǵy baýyrynyń aıtýynsha, ol dostarymen birge Hataıda páter jaldap turǵan. Olar zilzaladan keıin baılanysqa shyqpaǵan. Búgin týǵan-týystary, dostary, Astana Hub basshylyǵy, volonterler Mırbolatty izdeý úshin Túrkıaǵa ushady. Eger bireýde Mırbolat týraly aqparat bolsa, baýyryna (+7 702 430 2021) habarlasýdy ótinemiz”, – deıdi Mýsın.
Syrtqy ister mınıstrliginiń resmı ókili Aıbek Smadıarov aqparatty rastady. Túnde Mırýstyń baýyry, dostary men qazaqstandyq eriktiler Túrkıaǵa ushyp ketken.
Túrkıanyń ońtústigi men Sırıanyń soltústiginde qýaty 7,6, 7,7 bal bolǵan joıqyn jer silkinisiniń qurbandarynyń sany sát saıyn artyp jatyr. Sońǵy aqparatqa sáıkes, tabıǵı apattan 4 myńnan astam adam qaza tapqan. 20 myńnan artyq adam zardap shekken.
