Túrkıada jer silkinisi saldarynan qaza bolǵan taǵy bir qazaqstandyqtyń denesi tabyldy, dep habarlady Syrtqy ister mınıstrliginiń baspasóz qyzmeti.

"10 aqpanda Túrkıanyń ońtústik-shyǵysyndaǵy Kahramanmarash qalasynda qutqarý-izdestirý jumystary barysynda áıeldiń denesi tabyldy. Almatydan kelgen týystary ony QR azamaty Janar Jaqsybekova dep tanydy", - delingen habarlamada.

Qazaqstandyq dıplomattar qaza tapqan áıeldiń denesin Kahramanmarashtan Antalıaǵa jáne odan ári Almatyǵa jetkizýge, sondaı-aq, qajet qujattardy rásimdeýge kómektesken. Marqumnyń denesi Taldyqorǵan qalasyna jetkizilgen.

"Tasymaldaý boıynsha barlyq shyǵyndy memleket óz moınyna aldy. Sonymen qatar, Pegasus túrik avıakompanıasymen qaza tapqan QR azamatynyń birge kelgen týystaryna 90 paıyzdyq jeńildik berý týraly ýaǵdalastyqqa qol jetkizildi" delingen vedomstvo habarlamasynda.

8 aqpanda Túrkıanyń Qazaqstandaǵy elshisi tórt qazaqstandyq iz-túzsiz joǵalǵanyn habarlaǵan. Sol kúni úıindi astynan qazaqstandyq Sabına Mamadárova qutqaryldy. Ótken beısenbide qazaqstandyq qutqarýshylar Antakáda tolyǵymen qıraǵan alty qabatty ǵımarattyń úıindisin tazartý kezinde Qazaqstan azamaty Ádil Qadyrbekovtiń denesin tapty. Keıinirek ekinshi qazaqstandyq Mırbolat Qurmashevtyń denesi tabyldy.