Qazaqsha mázir suraǵan qonaqtaryn "fashıs, nasıst" dep balaǵattaǵan Almatydaǵy "Dınara" kafesi qyzmetkeriniń áreketinen polısıa eshqandaı qylmys quramyn tappady.

Kafe admınıstratory bolǵan jaǵdaı úshin keshirim suraýmen shektelip, mekeme jumysyn jalǵastyryp jatyr. Qazaqsha mázir áli joq. Aıtýlarynsha, ázirlenip jatyr. Sonymen osy daýǵa da osylaısha núkte qoıylatyn sıaqty.

Qazaqstanda qazaqtildi azamattardyń tutynýshylyq quqyǵy jıi buzylady. Kóptegen qyzmet kórsetý oryndary qazaqsha qyzmet kórsetpeıdi. Menú, afısha orys tilinde jazylady, áleýmettik jelidegi paraqshalar oryssha júrgiziledi. Túrli uıym qujattarynyń qazaqshasy joq. Qazaqshasy bolǵannyń ózinde uǵynyqty emes. Ózine túsinikti tilde qyzmet kórsetýdi suraǵandar ádette dóreki jaýap alyp, aýyr sózder estıdi. Qoǵamdyq tártip buzdy dep aıyptalyp, aıyppul arqalaıdy. Qylmystyq jaýapkershilike tartylǵandar da bar.

Sondaı jaǵdaılardyń birqatary tómende usynylyp otyr.

2013 jyly jýrnalıs Jarylqap Qalybaı ushaqta qazaqsha qyzmet kórsetýdi talap etip, SCAT áýekompanıasy qyzmetkerimen daýlasqan. Artynsha, "bortserikterge dórekilik tanytyp, olardyń qyzmetine kedergi keltirdi, ushýǵa qaýip tóndirdi, jolaýshylardyń mazasyn aldy" degen shaǵym boıynsha "usaq buzaqylyq" babymen ákimshilik jazaǵa tartylyp, úsh kúnge qamalyp shyqty.

Osyǵan uqsas jaǵdaı 2017 jyly qaıtalandy. Túrkıa azamaty Oǵyz Doǵan "Air Astana" bortynda qazaq tilinde qyzmet kórsetýdi talap etip, bortseriktermen daýlasqan. Túrkıa azamaty qaýipsizdikti saqtamaǵany úshin 6 800 teńge kóleminde aıyppul arqalap, artynsha ulttyq áýe kompanıasyn memlekettik tildi qurmettemegeni úshin sotqa berip, jeńip shyqqan.

2020 jyly Áleýmettik jelide ulttyq sıpattaǵy jazbalarymen tanymal, qazaq tilin bilmeıtin qazaqstandyqtardy synaýmen belgili belsendi Marǵulan Boranbaı "Ulttyq alaýyzdyqty qozdyrdy", "Konstıtýsıalyq qurylysty kúshpen ózgertýge árekettendi" dep aıyptalyp, 5 jylǵa sottady.

2021 jyly qazaqsha qyzmetti talap etip júrgen tirkelmegen Til maıdany qozǵalysynyń jetekshisi Qýat Ahmetovtyń ústinen "Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý" baby boıynsha qylmystyq is qozǵalyp, belsendi elden ketýge májbúr boldy.

Qazaq tilinde qyzmet kórsetýdi talap etip júrgen taǵy bir belsendi, pavlodarlyq Rýza Beısenbaıtegin 2021 jyly polısıa eshnárse túsindirmesten ustap alyp ketken. Polısıa qyzmetkerleri belsendini "úkimet qaǵazyn jyrtyp tastaǵany" úshin ustadyq degen. Rýza Beısenbaıtegi bul áreketke májbúrli túrde barǵanyn aıtqan. Óıtkeni buǵan deıin talaı márte ótinish, eskertý jasap júrip, ótinish blankterdiń qazaq tilindegi úlgisin usynýǵa qol jetkize almaǵan.

2022 jyly Pavlodar qalasynda Reseıdegi mobılızasıadan qashyp kelgenderge "Qyrym kimniń jeri?" degen suraq qoıǵan qoǵam belsendisi Dıas Quzaıyrov 5 táýlikke qamalyp shyqty.