Keshe túrmeden bosap shyqqan Qyrǵyzstannyń eks-prezıdenti Almazbek Atambaev Dýbaıǵa ushyp ketti, dep habarlady qyrǵyzstandyq 24.kg portaly. Onyń janynda uly Qadyrbek bar. 

"Almazbek Atambaev Bishkek – Dýbaı baǵyty boıynsha 6.34-te ushyp ketti. Sodan keıin ol emdelý úshin Ispanıaǵa ushady"delingen resmı habarlamada. 

2020 jyldyń maýsymynda 11 jylǵa bas bostandyǵynan aıyrylǵan Almazbek Atambaev birer kún buryn bostandyqqa shyqqan. Oǵan Bishkek mańyndaǵy kolonıada jappaı tártipsizdik uıymdastyrdy degen aıyp taǵylyp 16 jyl 8 aıǵa sottalǵan qylmys áleminiń avtorıteti Azız Batýkaevtyń merziminen buryn túrmeden shyǵýyna kómektesti degen aıyp taǵylǵan bolatyn. Bishkek qalasynyń Pervomaı aýdandyq sotynyń sheshimimen oǵan emdelý úshin shet elge shyǵýǵa ruqsat berilgen.