"2022 jylǵy qarashadan beri COVID-19-dy baqylaý jáne profılaktıkalyq jumystardy ońtaılandyrýǵa baǵyttalǵan qajyrly eńbektiń arqasynda epıdemıa profılaktıkasy jáne onymen kúreste sheshýshi jeńiske qol jetkizildi" dedi Qytaı saıası keńesiniń turaqty komıteti kezekti otyrysta.

Habarlamada 200 mıllıon adam medısınalyq kómek alǵany, 800 myń adam aýyr jaǵdaıdan ońalǵany aıtylady.

Dese de basshylar jaǵdaı jaqsara túskenimen, vırýs álem boıynsha taralyp, mýtasıaǵa ushyrap jatqanyn atap ótti. Saıası keńes egde adamdarǵa vaksına salý, medısınalyq taýarlardy jetkizý men óndirý arta beretinin de jetkizdi.

Saıası keńes málimdemesinde, koronavırýstan qansha adam ólgeni aıtylmaıdy.

Qytaıda ótken jyly qatań shekteýlerge qarsy jappaı narazylyq bastalǵannan keıin, birqatar shekteýler jumsartylǵan. Bul indettiń qaıta órshýine ákelip soqqan. Dúnıejúzilik densaýlyq saqtaý uıymy Qytaı birneshe aı boıy koronavırýs qurbandaryn azaıtyp kórsetip keledi dep sanaıdy. Keı sarapshylar tipti COVID-19-dan mıllıondaǵan adam mert bolýy múmkin degen boljam aıtady.

Saıası keńes málimdemesi jyl saıynǵy parlament sesıasyna birneshe apta qalǵanda jarıalanyp otyr. Sesıada saıasatkerler koronavırýs shekteýlerinen keıin damýy tejelgen ekonomıkany qaıta aıaqqa turǵyzý joldaryn izdeıdi.