Grýzıanyń burynǵy prezıdenti Mıhaıl Saakashvılı prezıdent Salome Zýrabıshvılıge úndeý jasady. Ol Máskeýdiń jaqyn arada Tblısıdi basyp alatynyn aıtty. 

"Menińshe, qazir barlyq saıası top Reseı tóńkerisine qarsy toptasyp, prezıdentpen shuǵyl keńesýi kerek. Ýkraınadaǵy sátsizdik pen Moldavadaǵy jeńilisten keıin Máskeý Tblısıdi ashyq túrde basyp almaqshy. Bul úshin kez kelgen shartqa kelisedi. Prezıdent óz ókilettiligin paıdalanyp álem elderine Grýzıany tolyq oqshaýlaý arqyly basyp alǵaly jatqanyn habarlaýy kerek. Qazir renishti eske túsirýdiń zamany emes. Kez kelgen múmkindikti paıdalanyp, osy soǵystan aman shyǵýymyz kerek", dep jazdy Mıhaıl Saakashvılı óziniń feısbýk paraqshasynda.

Mıhaıl Saakashvılı 2021 jyldyń kúzinen bastap qamaýda otyr. Oǵan laýazymdyq ókilettikterin asyra paıdalandy, depýtatqa shabýyl jasady jáne búdjet qarajatyn ysyrap etti degen aıyp taǵylǵan.