Ekonomıkalyq sarapshylar Ulttyq banktiń saıasatymen kelispeıdi. Onyń ústine devalvasıadan soń elimizdegi bankter qyrýar paıdaǵa kenelgen. Bul týraly «Qamshy» portaly KTK arnasyna silteme jasaı otyryp habarlaıdy.

Mamandardyń oıynsha, tól teńgeniń devalvasıasy men AQSH valútasynyń erkin aınalymǵa jiberilýi qatar jasalmaýy tıis bolatyn. Endi molynan aǵylǵan ımport jáne qunsyzdanyp jatqan teńgemen ınflásıany bir deńgeıde ustap turý múmkin emes .

Ulttyq banktiń qor bırjasyndaǵy saýdaǵa qatysyp, kún saıyn memlekettiń mıllıardtaryn jumsaýyn da ekonomıser beker áýreshilik dep esepteıdi.

Oılap qarańyzshy, sońǵy 20 kúnniń ishinde-aq elimizdiń bas qarjy uıymy, baǵany qalaıda ustaımyz degen jeleýmen 1 mlrd 400 mln dollardy bırjada satyp jiberipti. Al, anyǵynda, jaǵdaıdy turaqtandyrý úshin endi tek naryqty keńeıtý kerek. Iaǵnı qazir KASE-ke qatysatyn 5 iri banktiń sany kóbeıtilip, bırjaǵa eksportpen aınalysatyn kompanıalardy da jumyldyrý qajet degen sóz.

Teńge erkin aınalymǵa ketkeli, shekesi shylqyp baıyǵan tek bankter ǵana eken. Ranking.kz  portalynyń málimetinshe, ekinshi deńgeıli bankterdiń aktıvi 20 trıllıon teńgege jetken.

Bul buryn-sońdy bolmaǵan  kórsetkish. Iaǵnı otandyq 35 banktiń 33-i paıdaǵa kenelgen. Trıllıoner bankterdiń kóshin “Qazkom” bastap tur.

Bir aı ishinde qarjy ınstıtýtynyń aktıvi 436 jarym mlrd-qa ósipti. “Halyq banktiń” de jaǵdaıy jaman emes. Olar 426,9 mlrd teńge paıda tapqan. Úzdik úshtikte “Sberbank” te bar. Tamyz aıynda bank 198,4 mlrd teńge paıda taýypty.