Forbes jýrnaly álemdegi eń baı adamdar tizimin jarıalady. Olardyń arasynda qazaqstandyqtar da bar.

Forbes jýrnalynyń baılar tizimine engen qazaqstandyqtardyń kópshiligi eks–prezıdent Nursultan Nazarbaevtyń jaqyn adamdary men onyń tikeleı týystary. Olardyń bári Nazarbaev bılikte turǵanda baıyǵan, dep jazady Azattyq radıosy.

♦Jýrnal tizimine engen Qazaqstan azamattaryn kóshin 591 shi qatardaǵy Vladımır Kım bastap tur. Onyń baılyǵy 4,3 mıllıard dollardy quraıdy. Jýrnal ótken jylmen salystyrǵanda "Qazaqmys" korporasıasynyń aksıalarynyń basym bóligin jáne "KAZ Minerals" aksıonerlik qoǵamynyń úlesin ıelenetin Kımniń kirisi azaıyp, kompanıadaǵy ornyn joǵaltqanyn aıtty. Ol 2022 jyly 5 mıllıard dollar baılyǵymen 552 shi orynǵa jaıǵasqan edi.

♦Forbes jýrnalynyń málimetinshe, eks–prezıdent Nursultan Nazarbaevtyń qyzy Dınara Qulybaeva men onyń kúıeýi Tımýr Qulybaevtyń kapıtaly bir mıllıard dollarǵa ósken. Ótken jyly erli–zaıyptylardyń árqaısysynyń tabysy 3,8 mıllıard dollar bolsa, bıyl, 4,3 mıllıard dollarǵa jetken. Olar reıtıńten 636 shy oryn aldy.

♦Al Kaspi Bank ıeleriniń biri Vácheslav Kım 1513 orynnan  787 shi orynǵa kóterilgen. Onyń baılyǵy ótken jyly 2 mıllıard dollardy qurasa, bıyl eki esege kóbeıip, 3,6 mıllıard dollarǵa jetken.

♦Freedom Holding brokerlik kompanıasynyń basshysy Tımýr Týrlov 1292 orynnan  949 orynǵa kóterildi. Onyń baılyǵy ótken jyly 2,4 mıllıard dollar bolsa, bıyl 3,1 mıllıard dollarǵa ósken.

♦Burynǵy prezıdent Nursultan Nazarbaevtyń jaqyndarynyń biri 65 jastaǵy Bolat Ótemuratov reıtıńtegi 1096 shy orynynan 1104 orynǵa túsken. Forbes onyń baılyǵynyń 2,8 mıllıardtan 2,7 mıllıard dollarǵa tómendegenin aıtty.

Eske sala keteıik, Forbes tiziminiń alǵashqy úshtiginde Bernard Arno, Ilon Mask pen Djeff Bezos tur.