Búgin Qańtar oqıǵasyna baılanysty aıyptalyp, úıqamaqta otyrǵan Janbolat Mamaıdyń ústinen qozǵalǵan qylmystyq is boıynsha sot nátıjesi shyqty.

Sot Janbolat Mamaıdy 6 jylǵa shartty túrde sottaýǵa sheshim shyǵardy. Sonymen birge, oǵan 6 jylǵa deıin jýrnalısik, qoǵamdyq–saıası qyzmetpen aınalysýǵa da tyıym saldy. 

Inga Imanbaıdyń málimdeýinshe, Janbolat Mamaı eshqandaı qylmys jasamaǵanyna aıǵaq–dálelder keltirse de, ony 6 jylǵa shartty túrde sottaý týraly sheshim qabyldanǵan.

"Bul saıası astary bar qýdalaý ekeni sózsiz. Janbolattyń ózi de ony sotta ashyq aıtty. Aldaǵy ýaqytta apelásıalyq shaǵym joldaımyz. Qazaqstanda ádildik tappaıtynymyz anyq. Demek, halyqaralyq uıymdardyń kómegimen BUU deńgeıinde shaǵym jazamyz"– dep habarlady Inga Imanbaı.

Úkim zańdy kúshine engenshe belsendi úıqamaqta bolady.

Eske sala keteıik, Janbolat Mamaı 2022 jylǵy aqpan aıynda qańtar oqıǵasynyń 40 kúndigine oraı ótken qaraly mıtıńten keıin uzamaı ustalyp, qarashaǵa deıin tergeý ızolátorynda qamaýda otyrǵan. Oǵan o basta jappaı tártipsizdik uıymdastyrdy, polısıaǵa til tıgizdi, jalǵan aqparat taratty degen aıyptar taǵylǵan. Byltyr qazan aıynyń sońynda jappaı tártipsizdik uıymdastyrdy degen aıyp beıbit jıyn ótkizý tártibin buzdy degen jeńilirek aıypqa aýystyrylǵany belgili boldy. Al 2 qarasha kúni sot oǵan qatysty bultartpaý sharasyn ózgertip, tergeý ızolátorynan úıqamaqqa jibergen bolatyn.