Reseıdiń "Vagner" jaldamaly ásker jasaǵyna qosylǵan  Qazaqstan azamaty vıdeo málimdeme jasady. Ol jelide taraǵan vıdeoda Reseıdiń Ýkraınaǵa jasaǵan shabýylyn "arnaıy operasıa" dep atady.

"Men óz erkimmen arnaıy áskerı operasıaǵa úlesimdi qosýǵa keldim. Maǵan bul jer unady. Ujym da jaqsy, ózimdi tapqandaı sezinemin. Psıhıkalyq jaǵdaıym jaman emes. Meni bul jerge eshkim kúshtep ákelgen joq" – dedi ol.

Eske sala keteıik, 23 jastaǵy Marǵulan Bekenov Reseıdiń Tomsk qalasyna oqýǵa ketken. Osyǵan deıin Bekenovtiń anasy Almıra Bekenova ulyn "Vagnerge" aldap qosyp, soǵysqa áketkenin aıtqan bolatyn. Al Qazaqstannyń syrtqy ister mınıstrligi Marǵulan Bekenov "Vagner" qataryna óz erkimen qosylǵan dep málimdedi.

"Vagner" – Reseı prezıdenti Pýtınniń jaqtasy, Reseı Federasıasynyń qaharmany ataǵyna ıe Evgenıı Prıgojınniń jeke áskerı bólimi. "Vagnerlikter" Ýkraınamen qatar Sırıa men Afrıka elderindegi soǵysqa qatysyp jatyr. Sarapshylar "Vagner" tobynyń áreketterin qylmysqa jatqyzady. Prıgojın óziniń jeke áskerı bólimine Reseı túrmelerinde otyrǵandardy, Ortalyq Azıadan kelgen mıgranttardy tartqan.

Qazir "Vagner" Ýkraınanyń Bahmýt qalasynda bolyp jatqan aýyr shaıqasqa qatysyp jatyr. Ýkraınadaǵy soǵysta Prıgojın "áskeriniń" kóp shyǵynǵa ushyraǵany da aıtylady.