Almatyda Kenjeǵalı Saǵadıevtiń 85 jyldyq mereıtoıyna oraı halyqaralyq forým ótti. Forýmda álemdik oqıǵalardyń ekonomıkaǵa áseri, álemdik qarjy arhıtektýrasy, halyqaralyq saýda jáne ınfraqurylym týraly jahandyq máseleler týraly sóz qozǵaldy.

Atalǵan sharaǵa profesor Jaqsybek Kúlekeev, SDÝ ýnıversıtetiniń prorektory Qaırat Moldashev sekildi ǵalymdar men sheteldik profesorlar qatysty. De Monfort Qazaqstan ýnıversıtetiniń ekonomıka kafedrasynyń dosenti Mazen Dıvanı Qazaqstan men Úndistan, Qytaı arasyndaǵy jańa kelisimge baılanysty pikir bildirip, onyń ekonomıkaǵa tıgizer áserin baıandady.

"Eń birinshi Qazaqstan men Qytaı arasyndaǵy erkin saýda-sattyq jónindegi kelisim Qazaqstan úshin de, Qytaı úshin de tıimdi bolatynyn aıtqym keldi. Eki tarap úshin tıimdilikti esepteý de osyny kórsetti. Negizinen bul kelisim Qazaqstan úshin Qytaıǵa qaraǵanda utymdy bolar edi. Óıtkeni Qytaıdyń iri kólemdegi ekonomıkalyq jaǵdaıy men erkin saýda qarym qatynas Qazaqstanǵa úlken paıda alyp keletini sózsiz. Sol sebepti meniń oıymsha Qazaqstan bul kelisimge mindetti túrde qol qoıýy kerek", dedi sheteldik ekonomıs. 

Forýmǵa qatysqan spıkerler Reseı men Ýkraına arasyndaǵy soǵys ekonomıka salasyna jańa ózgerister engizetinin aıtty. Sondaı-aq Qazaqstan ekonomıkasy qalypty túrde ósip kele jatqanyn, aldaǵy ýaqytta jaqsy kórsetkishterge qol jetkizge bolady dep boljam jasady.