Jeńis kúni qarsańynda soǵys ardagerlerine 4,6 mlrd teńge somasyna birjolǵy materıaldyq kómek kórsetiledi, dep málimdedi Eńbek jáne halyqty áleýmettik qorǵaý mınıstrligi. 

Jeńis kúni qarsańynda jergilikti atqarýshy organdar 4,6 mlrd teńge somasynda birjolǵy kómek kórsetýdi kózdep otyr. Materıaldyq kómektiń eń tómengi mólsheri – 1,5 mln teńge, al Aqtóbe jáne Pavlodar oblystarynda 2 mln teńge. 

Elimizde Ekinshi dúnıejúzilik soǵysqa qatysqan 222 ardager, 60 106 – soǵys múgedegi jáne jeńiske úles qosqan ózge de azamattar turady. Olardyń ishinde: qorshaýdaǵy Lenıngrad turǵyndary – 78 adam; kámeletke tolmaǵan kezde konslagerde bolǵan – 175 adam; qaıtys bolǵan soǵys múgedeginiń jubaılary – 2 413 adam; soǵysta qaza tapqan jaýyngerlerdiń jesirleri – 4 adam; tyl eńbekkerleri – 57 436 adamdy quraıdy. 

2023 jylǵy 1 mamyrdaǵy statısıka boıynsha zeınetaqyny eskere otyryp, aı saıyn beriletin áleýmettik tólemderdiń ortasha jıyntyq mólsheri 150–230 myńnyń arasynda bolmaq. 

Budan bólek ardagerlerge turǵyn úıdi jóndeý, otynmen qamtamasyz etý , qoǵamdyq kólikte jol júrý jeńildikteri, dári– dármekpen qamtamasyz etý, tis protezdeý, azyq– túlikpen qamtamasyz etý syndy qosymsha kómek túrleri de qarastyrylǵan.