Qandas mártebesin alý úshin ótinimder Qazaqstan elshilikteri arqyly "bir tereze" qaǵıdaty boıynsha qabyldanady. Jańa tetik birqatar memlekette pılottyq rejımde iske asyrylyp jatyr, dep habarlaıdy eńbek jáne halyqty áleýmettik qorǵaý mınıstrligi.

"Bul elge kelý, jumys orny men turǵyn úı berý múmkindikteri týraly máselelerdi sheshýge jáne respýblıka aýmaǵyna kirmeı–aq qandas mártebesin alýǵa múmkindik beredi", – delingen habarlamada.

Mınıstrliktiń aqparatynsha, qazir etnıkalyq qazaqtardan ótinish qabyldaý Qazaqstan syrtqy ister mınıstrliginiń vızalyq rejım elderindegi (Túrikmenstan, Mońǵolıa, Qytaı, Iran, Aýǵanstan) mekemelerinde pılottyq rejımde júrgizilip jatyr. Keıinirek elshilikter arqyly ótinim qabyldaý vızasyz rejımi bar elderde de júrgiziledi.

Búgingi tańda Qazaqstannyń shet elderdegi mekemeleri arqyly shetelde turatyn etnıkalyq qazaqtardan 771  ótinish qabyldandy. Sondaı–aq, Mańǵystaýda oblys ákimi orynbasarynyń basshylyǵymen qandastardy jaıǵastyrý jáne qabyldaý jónindegi arnaıy komısıa quryldy, ol etnıkalyq qazaqtardyń óńirde turýǵa ótinishterin derbes qaraıdy.

"Turaqty negizde jumys isteıtin osyndaı komısıalar aldaǵy ýaqytta elimizdiń barlyq óńirinde qurylady", – dep málimdedi eńbek mınıstrligi.