Qala ákimi Erbolat Dosaev jumys sapary barysynda azamattyq qorǵanys nysandaryna baryp, órt sóndirý deposynyń qurylysymen tanysty jáne qutqarýshylardyń túrli tótenshe jaǵdaılarǵa daıyndyq deńgeıin baǵalady.

Qazirgi ýaqytta megapolıstiń órtke qarsy qaýipsizdigin tek 19 órt sóndirý bólimshesi qamtamasyz etedi. Normalarǵa sáıkes bir órt sóndirý deposyna qyzmet kórsetý radıýsy 3 km – den aspaýy tıis. Qalanyń ósýin, turǵyn úı-kommýnaldyq ınfraqurylymnyń damýyn, kólik júktemesin jáne halyq sanynyń ulǵaıýyn eskere otyryp, Almatyda búginde 15 órt sóndirý deposy jetispeıdi. Órt sóndirý bólimsheleriniń tapshylyǵy qutqarýshylardyń tótenshe jaǵdaı ornyna kelý ýaqytyna tikeleı áser etedi. Jumys sapary barysynda qala basshysyna Bostandyq aýdany Nur-Alataý shaǵyn aýdanynda salynyp jatqan órt sóndirý deposy tanystyryldy. Depo bes shaǵyn aýdannyń («Qazaqfılm», «Alataý», «Nur-Alataý», «Ermensaı», «Kókshoqy» - jalpy sany 32 myńnan astam adam, 94 kásiporyn) turǵyndaryn órtten qorǵaýmen qamtamasyz etedi jáne órt ornyna kelý ýaqytyn edáýir qysqartýǵa múmkindik beredi. Qala basshysy ınjenerlik jelilerdi júrgizý máselelerin jedel sheship, aǵymdaǵy jyldyń jeltoqsan aıynda nysandy paıdalanýǵa berýdi tapsyrdy. Aldaǵy jyldary Túrksib, Bostandyq, Naýryzbaı aýdandarynda taǵy úsh órt sóndirý deposyn salý josparlanýda.

Tótenshe jaǵdaılar departamenti ǵımaratynyń aýmaǵynda Erbolat Dosaevqa órtke qarsy jáne avarıalyq-qutqarý tehnıkasy usynyldy. Búginde Almaty órt sóndirýshileriniń qaramaǵynda 183 mashına bar, onyń ishinde órt sóndirý avtosısternalary, órt sóndirý-qutqarý avtomobılderi, motosıklder jáne t. b.

Qala basshysy materıaldyq-tehnıkalyq jaraqtandyrýdy jaqsartý jáne qutqarýshylardyń utqyrlyǵyn arttyrý maqsatynda qosymsha 10 avtokólik satyp alýǵa qarajat bólýdi tapsyrdy. Erbolat Dosaev bıik ǵımarattardyń joǵarǵy qabattarynda qutqarý operasıalaryn júrgizý úshin teleskopıalyq kótergishteri bar úsh mashınany satyp alý rásimin jedeldetýdi mindettedi. Qazirgi ýaqytta Almatyda osyndaı nebári úsh avtomobıl ǵana bar.

Almaty ákimi sondaı-aq QR TJM «Apattar medısınasy ortalyǵy» mamandardyń materıaldyq-tehnıkalyq jabdyqtalýymen tanysty. Arnaıy qyzmetke óz ǵımaraty qajet. Erbolat Dosaev qolaıly ýchaskeni tańdaǵannan keıin qajetti obektiniń qurylysyna qarajat bólýge daıyn ekendigin bildirdi. Materıaldyq jaraqtandyrýdy jaqsartý barysynda Almaty ákimi  medısınalyq qaldyqtardy tazartý úshin  qosymsha 5 pnevmatıkalyq jabdyq satyp alýdy tapsyrdy.

Qala basshysyna Almaty qalasy TJD krızıstik jaǵdaılardaǵy basqarý zalynyń jumysy kórsetildi. Onyń bazasynda birqatar sıfrlyq jobalar, sonyń ishinde morendi kólderdiń serpindiligin baǵalaýǵa jáne sel qubylystarynan týyndaǵan TJ qaýpiniń deńgeıin tómendetýge múmkindik beretin sel qaýiptiliginiń avtomattandyrylǵan monıtorıńi júıesi engizildi.

Almaty ákimi jer silkinisi týraly erte habarlaýdyń avtomattandyrylǵan júıesin iske asyrý jobasymen tanysty. Joba 28 seısmostansıa salýdy kózdeıdi, onyń 11-i ótken jyly paıdalanýǵa berildi, qalǵan 17-si aǵymdaǵy jyly iske qosylady. Eskertý júıesi ústimizdegi jyldyń mamyr aıynda «Darmen» mobıldi qosymshasymen úndestiriledi, ol halyqty seısmıkalyq qaýip-qater, daýyldy gıdrometeorologıalyq qubylystar týraly ýaqtyly habardar etýge múmkindik beredi jáne t.b. Qala basshysy jer silkinisi týraly derektermen almasý úshin Qyrǵyzstan qyzmetterimen belsendi yntymaqtastyqta jumys jasaýdy tapsyrdy. Kezdesý barysynda qalanyń 1100 kamerasynan beıneni shyǵarýǵa qabiletti jáne órtterdi anyqtaýǵa jáne qyzmetterge jedel áreket etýge múmkindik beretin vıdeomonıtorıng júıesi  kórsetildi.

Almaty ákimi Alataý aýdanyndaǵy №31 bóbekjaı bazasynda yqtımal TJ kezinde halyqty jınaý pýnktteriniń biriniń jumysymen tanysty, onda TJ kezinde zardap shekken halyqty ýaqytsha ornalastyrý úshin palataly qalashyq ornalastyrylǵan. Erbolat Dosaev TJ kezinde jınaý pýnkti turǵyndardy qabyldaýdy qamtamasyz etý úshin qosymsha jaraqtandyrýdy talap etetinin atap ótti: halyqty jınaý pýnktterin materıaldyq qamtamasyz etý boıynsha naqty standarttardy engizý, onyń ishinde kúzgi-qysqy aýa raıy jaǵdaılaryna beıimdelgen palatkalardy satyp alý qajet.

Erbolat Dosaev Alataý aýdanyndaǵy azamattyq qorǵanys qurylystarynyń birine bardy. Shamamen 50 jyl buryn salynǵan qorǵaný orny 150 adamǵa arnalǵan. Strategıalyq mańyzdy obekt apatty jaǵdaıda jáne panalanýshylardy qabyldaýǵa daıyn emes.

Aralaý qorytyndysy boıynsha Erbolat Dosaev aýdan ákimdigi memlekettik aktıvter basqarmasymen birlesip bir aı merzimde qorǵanys qurylystaryn komýnaldyq menshikke qaıtarý jóninde usynystar engizýdi tapsyrdy. Sondaı-aq, qala basshysy yqtımal TJ jaǵdaıynda halyqty tirkeý jáne qabyldaý boıynsha biryńǵaı standarttardy ázirleýdi jáne barlyq komýnaldyq qyzmetterdiń daıyndyǵyn tekserý úshin aǵymdaǵy jyldyń kúzinde tolyq kólemdi oqý-jattyǵýlar ótkizýdi tapsyrdy.