Elimizdiń barlyq mektebi tótene jaǵdaılarǵa daıyn emes. Jyl basynan beri bilim berý mekemelerinde 50 myńnan astam kemshilik anyqtalǵan. Bul týraly Tótenshe jaǵdaılar mınıstrligi málimdedi.

Saqtyq sharasyna salǵyrt qaraǵandar saldarynan sońǵy 10 aıda tilsiz jaý 14 balanyń ómirin jalmaǵan. Qaıǵyly jaǵdaılardyń kóbi órt, ıis tıip ýlanýdan bolǵan, dep habarlady Almaty.tv.

Apattyń aldyn alýǵa bizdegi bilim oshaqtarynyń eshbiri daıyn bolmaı shyqty. Tótenshe jaǵdaılar mınıstrliginiń aqparynsha, jyl basynan beri 5 myńnan astam mektepke tekseris júrgizilipti. Nátıjesinde saqtyq erejelerin eskermegen 50 myńǵa jýyq zańbuzýshylyq anyqtalǵan. Tipti, 55 oqý ordasynda qarapaıym dabyl túımeshegi de qoıylmaǵan eken.

"Osy jyly mektepterde 4 órt oqıǵasy boldy. Órt kezinde 8 jaǵdaıda avtomatty dabyl júıesi iske qosylyp, 1 jaǵdaıda jumys istemeı qaldy. Órt qaýipsizdik talaptarynyń negizgi buzylýy órtti avtomatty túrde anyqtaıtyn dabyldyń bolmaýynan oryn alǵan", – dedi QR Tótenshe jaǵdaılar mınıstrligi órtke qarsy qyzmet komıtetiniń tóraǵasy Nurbolat Derbisov.

Qaýipsizdiktiń saqtalmaýy kóbine mektep jetispeýshiliginen bolady. Keı óńirde sabaq ákimdik ǵımaratynda ótedi. Tar kabınettiń ózin áreń kádege jaratyp otyrǵanda, saqtyq sharasy shet qalyp qoıatyn kórinedi.Sońǵy 5 jylda tilsiz jaý elimizde 776 balanyń ómirin jalmaǵan. Bıyldyń ózinde 14 oqýshy ajal qushypty. 

Zań boıynsha mektepte tilsiz jaýdyń aldyn alý talaby saqtalmaǵan jaǵdaıda bala oqytýǵa tyıym salynady. Alaıda eldegi bilim oshaǵynyń barlyǵy erejeni eskermegen bolyp otyr.