Myna men kúndelikti qyz­me­timdi atqaryp, erteńgi jos­pa­rymdy tujyrymdap demalyp otyrǵanda ózimdi jaısyzdaý se­zindim. Deg­birsizdengendeı bol­ǵan soń, ju­baıym esh alańsyz jedel járdem shaqyra saldy. Meıirbıke tól mindetine saı qan qysymyn tekserip, birer saýalyna qanaǵattanarlyq jaýap alǵannan keıin: «Jaqpaıtyn bir taǵamnan ýlanyp qalǵan shyǵarsyz, qalaı-qalaı emes, joǵary bilimdi dári­gerge kóringenińiz jón bolar. Kelisseńiz birge júrińizder» dedi. Sodan Taldyqorǵandaǵy jan saqtaý bóliminde 11 kún-tún jattym. Jaǵdaı nashar. Ol kúnderdi dosyń túgili dushpanyńnyń basyna bermesin, tizbelep aıtýdyń ózi artyq.

Sodan qudaıdyń qudiretimen jeksenbi kúni besin ýaqytynda buryn esh jerden kórmegen úsh dáriger kirip kelip, árqaısysy óz salasy boıynsha tekserip, baı­saldylyqtan taımaı, senimmen ushaqqa mingizip, Almatydaǵy «A.N.Syzǵanov atyndaǵy hırýrgıa ulttyq ǵylymı ortalyǵy» AQ emhanasyna jetkizdi. Jańa ortanyń áseri me, álde medısına qyzmetkerleriniń iltıpaty yqpal etti me, quddy sony soqpaqpen ja­ńa álemge engendeı sezindim. Qalaı ekeni, áıteýir, bir shıpa janyma bolatyny bilingen de tárizdi. Hırýrgıa ulttyq ǵylymı ortalyǵynyń reanımatolog-anes­tezıologi Saltanat Ratqyzy áp-sátte dıognozdy dál qoıyp be­ri­simen, ilezde bas dárigerdiń dıag­nostıka jónindegi orynbasary, fýnksıonaldy dıagnostıka jáne endoskopıa bóliminiń meńgerýshisi, joǵary sanatty dáriger, Erlan Ábdireshovke jet­kizdi. Dereý shet­­eldik qon­dyrǵynyń túbine jaı­las­tyra otyrǵyzyp, jelim tutyq­shany tanaý qýysynan kirgize tu­ryp, birden qaı jerge saqına qoıý kerektigin anyqtap ári sol zamatynda ornalas­tyryp janymdy rahat bir kúıge engizdi. Sóıtip, atal­ǵan ortalyqtyń aq halatty ab­zal jandary izettiligi men meıi­rimine bólep te, emdep te apta boıy aǵzadan aqqan qyzyl qandy sanaýly saǵattarda toqtatty. Muny kásibı biliktiliktiń artýy hám zamanaýı medısınalyq qondyrǵylardy jetik meńgerip, paıdalana bilý demeske áddińiz qalmaıdy. Súısinesiz. Rıza bolyp ishki oıyńyzdy aqtarýǵa kompúterdiń aldyna otyrǵanda ret-retimen tizilip bergende tánti bolasyz. Alǵaýsyz aq tilek aǵytyla beredi.

Álbette, «Bulaq basynan tu­nady» degen danalyqty usta­na­syz. Sebebi, taıaý kúnderi «A.N.Syz­ǵanov atyndaǵy hırýrgıa ult­tyq ǵylymı ortalyǵy» AQ Bas dırektory Jetkergen Arzyqulovtyń qabyldaýyna arnaıy bardym. Kezegim kelgende kirdim. Bas dı­rektordyń tik turyp, qol alysyp amandasýynyń ózi ishińdi jylytyp, kisilik kelbetin ashyp tur. Naǵyz dá­ri­gerge tán symbattylyq. Qara­paıym jandarǵa qashanda qurmet kórsete biletindigimen adamı qundylyǵyn anyq ańǵartyp tur. Imanjúzdiligi, jalpy kabınet keńistiginiń jaımashýaqtyǵy bolar, nebári úsh mınýtta Jet­kergen Ánesuly basqaryp otyr­ǵan dárigerlerge degen sheksiz alǵysymdy, osy ortalyqqa qa­shan, kimder arqyly qalaı túsip, emdelip shyqqanymdy jáne maǵan ómir syılaı bilgen jandar aldyndaǵy paryzymdy bas basylym arqyly elge jetkizetinimdi aıtyp berdim. Ár sózime zeıin qoıa muqıat tyńdap, respýblıkalyq «Egemen Qazaqstan» gazetin qur­metteı biletindigin ashyq aıtyp, múmkindiginshe qarapaıym halyqtyń únin, elmen etene aralasýǵa bul ortalyqtyń ábden beıimdelgenin kórsetý qajettigin kóńilime túıdire bildi. Óıtkeni, «A.N.Syzǵanov atyn­daǵy hırýrgıa ulttyq ǵylymı or­­talyǵy» emhanasynda janyna shıpa taýyp, alǵystaryn aǵytqan eldiń aqjarma aq tilegin de, sary altyndaı saraly sózin de et qu­la­ǵymmen estidim ǵoı. Em­delip shyqqan jandardyń medısına qyzmetkerlerine tánti bola turyp, sózderimen jetkize almaǵan alǵysyn kózderimen uǵyndyrýǵa qareket etip meıirim shýaǵyn barynsha tókkenderin kórdim ǵoı. Adamdardyń bul ortalyq týraly Han Táńiriniń saf aýasyndaı taza da tunyq oıyn oqý da bir ǵanıbet eken. Oı tereńine boılaı bilseńiz, sol zamatta adamǵa ómir syılaı bilýdiń ózi bir baqyt ekenin de túısinesiz. Adamǵa ómir syılaý degende, dál osy tusta respýblıkamyzǵa keńinen tanymal qos tulǵanyń esimin atap ótýdi azamattyq paryzym dep sanaımyn. Osynaý joldardyń avtory dármensiz kúıge túsken sátte Qazaqstan Respýblıkasynyń Densaýlyq saqtaý jáne áleýmettik da­mý vıse-mınıstri Salıdat Qaıyr­­bekova men respýblıkalyq «Egemen Qazaqstan» gazeti AQ pre­zıdenti Saýytbek Abdrahmanov dereý qol ushyn berip, sebepshi bolǵan edi. «Aýyryp turdyń – aýnap turdyń» degen danalyqty da aıtyp kóńilimdi qosh etken jandardy qalaı qurmettemeıin. Qurmet tuta otyryp, «A.N.Syzǵanov atyn­daǵy hırýrgıa ulttyq ǵylymı ortalyǵyna» senim artýlary kásibı de, ómir­lik te tájirıbeni to­ǵystyra aqyl tarazysynan ótkize bile­tin suńǵylalyqtary dep te baǵalaımyn.

Qoryta aıtqanda, bul joldar meniń jeke basymnyń alǵysy bolyp aq qaǵazǵa tústi. Sol alǵys oı tunyǵynan tolqyp úlken týyndyǵa da aınalýy bek múmkin. Ony ýaqyt atty tóreshi kórseter.