Túrkıalyq Sumhuriet basylymy saılaýdaǵy Erdoǵannyń qarsylasy Kemal Kylychdaruly 110 jylǵa sottalýy múmkin ekenin habarlady. Sondaı-aq oǵan saıası qyzmet etýine tyıym salynýy múmkin. 

Túrkıa prezıdenti Rejep Taıyp Erdoǵan qarsylasynyń ústinen 28 talap aryz túsirgen. 

"Buǵan deıin Kemal Kylychdarulynyń parlamenttik ımýnıteti bolǵan soń birqatar talaptar toqtatylǵan bolatyn. Ol jańa shaqyrylymǵa saılanbady. Sol sebepti talap aryzdar qaıta qaralyp jatyr", - dep jazady Cumhuriyet jýrnalısi Barıs Túrkoǵlý.

Aryzdardyń kópshiligi boıynsha saıasatker tórt jylǵa deıin, al barlyq aryzdar boıynsha 110 jylǵa deıin bas bostandyǵynan aıyrylýy múmkin. Sondaı-aq eks-kandıdattyń saıası qyzmeti de toqtaıdy. Qazir Kemal Kylychdaruly opozısıalyq "Halyqtyq-respýblıkalyq" partıasyn basqarady.