Almatyda apelásıalyq sot zańger áıeldiń ólimine qatysty is boıynsha úkim shyǵardy. 

Almaty qalalyq sotynyń apelásıalyq satysynyń sheshimi boıynsha Talǵat Nurtaevtyń úkimi qaıta qaralatyn bolady. Osylaısha, apelásıalyq sot alqasy Nurtaevtyń úkimin joıyp, isti sottyń basqa quramdaǵy jańa sot talqylaýyna jiberý týraly sheshim qabyldady.

Buǵan deıin almatylyq Talǵat Nurtaev óziniń burynǵy áıeli zańger Aıman Asanovany  pyshaqtap óltirgen bolatyn. Sot ony "afekt" jaǵdaıynda qylmys jasady dep 1.5 jylǵa sottaǵan. Áleýmettik jelide sot úkimi qyzý talqyǵa túsip, narazylyq bildirgenderdiń sany artty. 

Sot málimetinshe, alqabılerdiń qatysýymen úkimniń kúshin joıýǵa mynalar negiz boldy:

• Sot buryn zerttemegen dáleldemelerge silteme jasaǵan qorǵaýshy taraptyń advokatynyń jaryssózinde sóıleý tártibiniń buzylýy;
• Alqabılerdiń aldyna belgili bir zańdy termınderdi qoldana otyryp suraqtar qoıyldy, mysaly: kenetten paıda bolǵan qatty psıhıkalyq tolqý jaǵdaıynda kisi óltirý, bul zańmen ruqsat etilmeıdi;
• Aıyptaýshy tarap is materıaldaryna qosa berilmegen beınejazbasy bar dısk túrinde jol berilmeıtin dáleldeme usyndy, dıskiniń shyǵý tegi eshteńemen rastalmady, mundaı dısk zattaı dáleldemeler retinde tanylmady.                                                     

"Apelásıalyq satydaǵy sot qylmystyq jáne prosestik zańnama normalarynyń saqtalýyn tekseredi jáne osy negizde alqabılerdiń qatysýymen úkimniń zańdylyǵyn, durystyǵyn jáne ádildigin tekseredi. İs júrgizý normalaryn buzý isti jańa sot talqylaýyna jibere otyryp, úkimniń kúshin joıýǵa negiz boldy", - dep habarlady sot.