Búgin Astananyń 25 jyldyǵyna oraı «Astana – meniń Otanymnyń elordasy» atty áleýmettik týr bastaldy. Atalǵan týrdyń alǵashqy qatysýshysy bolyp Abaı oblysynan 50 bala keldi.

Astana qalasy ákimdigi uıymdastyrǵan týrǵa búkil respýblıka boıynsha áleýmettik jaǵdaıy tómen, kópbalaly otbasylardyń, jetim jáne ata-ananyń qamqorlyǵynsyz qalǵan 1000 bala qatysady dep josparlanýda.

-Astanaǵa kelgen balalar elordanyń «Astana-Báıterek» monýmenti, «Nur Álem» bolashaq energıasy mýzeıi, QR Tuńǵysh Prezıdentiniń mýzeıi, QR Ulttyq mýzeıi, «Han Shatyr» saýda ortalyǵy sıaqty qalanyń kórneki jerlerin aralaıdy. Sonymen qatar balalarǵa arnalǵan eń qyzyqty saýyqtyrý oryndary – Okeanarıým, Jýnglı, Qazaqstandaǵy eń úlken sholý dóńgelegi, batýt saıabaǵyn kórsetý josparlanýda, - dedi Astana qalasynyń Investısıalar jáne kásipkerlikti damytý basqarmasynyń týrızmdi damytý bóliminiń basshysy Ómiruzaq Tileýjan.

Onyń aıtýynsha, balalar Astanany 3 kún aralaıdy. Olarǵa qalany kórsetetin arnaıy adamdar bar. Olardyń jatyn jeri, 3 mezgil tamaqtaný máselesi aldyn ala sheshilip qoıylǵan.