Atyraý qalasynyń jańa ákimi bolyp Shákir Keıkin taǵaıyndaldy. Bul týraly oblystyq ákimdik habarlady. Resmı derek boıynsha Shákir Keıkin qala ákimi laýazymyna prezıdent ákimshiliginiń kelisimimen taǵaıyndalǵan. 

2023 jyldyń naýryzynan bastap Shákir Keıkin Saýda jáne ıntegrasıa mınıstrliginiń saýda departamentiniń basshysy qyzmetin atqardy.

Al 2019-2022 jyldar aralyǵynda Maqat aýdanynyń ákimi qyzmetin atqarǵan. Qańtar oqıǵasy kezinde Maqat aýdany turǵyndary Jańaózen turǵyndaryn qoldaý úshin narazylyqqa shyǵady. Alǵashqy kúni Shákir Keıkin halyq aldyna shyǵyp basý aıtqan. Alaıda ekinshi kúnnen bastap aýdan ákimi halyq aldyna shyqpaı qoıady. Halyq aýdan ákimi men polısıa bolmaǵan soń aýdan ishindegi tártipti ózderi qadaǵalaýǵa kóshken. 

Azattyq basylymynyń dereginshe, sol ýaqytta halyq bir aýyzdan belsendi Ǵazız Ǵabdýllındi aýdan ákimi etip saılaıdy. 

5 qańtarda aýdandyq maslıhat depýtattary Shákir Keıkinge senimsizdik bildiretini týraly hattama toltyryp, Ǵazız Ǵabdýllınniń kandıdatýrasyna qoldaý bildiredi. 

Sodan keıin Ǵabdýllınniń Atyraý oblysynyń ákimi Mahambet Dosmuhambetovpen kezdesýi ótti, ol Ǵabdýlındi aýdan ákimi laýazymyna bekitý týraly máseleni qaraýǵa ýáde berdi. Biraq jaǵdaıdy turaqtandyrǵannan keıin Shákir Keıkin óz qyzmetine oraldy.