Ulttyq ekonomıka mınıstri Álibek Qýantyrov "Tarıfti ınvestısıalarǵa aıyrbastaý" baǵdarlamasyn iske asyrý aıasynda komýnaldyq qyzmetterdiń tarıfi orta eseppen qanshaǵa ósetinin aıtty.
Onyń aıtýynsha, 2023 jyldyń ekinshi toqsanynda mınıstrlik bıyl 1 shildeden bastap tarıfter men ınvestısıalyq baǵdarlamalardy ózgertýge 212 ótinimdi qysqa merzimde bekitken.
"Nátıjesinde tutynýshylar men kásiporyndar múddesiniń teńgerimin eskere otyryp, komýnaldyq qyzmetter tarıfteriniń ózgerýi qalypty bolyp, ortasha eseppen 10-30% quraıdy. Bul rette halyqtyń osal toptary komýnaldyq tólemder úshin shyǵyndardyń bir bóligine ótemaqy berý esebinen ákimdikterdiń komýnaldyq qyzmetterge aqy tóleý jónindegi kómegine sene alady", - dep málimdedi Qýantyrov úkimet otyrysynda.
Ol jylýmen jabdyqtaýda jelilerdiń tozý deńgeıi joǵary qyzyl aımaqtaǵy kásiporyndar úshin ınvestısıa tartý basym tártippen júzege asyrylatynyn atap ótti. Jylýmen jabdyqtaý salasynda 27 kásiporyn boıynsha tozý deńgeıi 65%-ten asady, onyń ishinde 24 kásiporyn úshin ınvestısıalyq baǵdarlamalar bekitildi. Atalǵan salaǵa bıyl 112 mlrd teńge ınvestısıalaý josparda bar.
"Bıyl jelilerdiń tozýy 58%-ten 55%-ke deıin tómendep, 2024 jyly qyzyl aımaqtan 6 kásiporyn shyǵady dep josparlanyp otyr. Eki bólmeli páter úshin jylý boıynsha ortasha esep 1 620 teńgege nemese 20%-ke artady", - dedi mınıstr.
Elektrmen jabdyqtaý salasynda 19 kásiporynnyń tozý deńgeıi 70%-ten asady. Sonyń ishinde 16 kásiporyn úshin ınvestısıalyq baǵdarlamalar bekitildi. Atalǵan salaǵa osy jyly 92 mlrd teńge ınvestısıalaý josparda bar.
"Bıyl jelilerdiń tozýy 64%-ten 62%-ke deıin tómendeıdi dep kútilýde. Ortasha kvıtansıa 660 teńgege nemese 20%-ke ulǵaıady", dedi ulttyq ekonomıka mınıstri.
Al sýmen jabdyqtaý salasynda 15 kásiporynnyń tozý deńgeıi 70%-ten asady, onyń ishinde ınvestısıalyq baǵdarlamalar 13 kásiporyn úshin bekitilgen. Atalǵan salaǵa osy jyly 29,5 mlrd teńge ınvestısıalanady.
Mınıstrdiń aıtýynsha, bıyl jelilerdiń tozýy 63%-ten 58%-ke deıin tómendep, 2024 jyly qyzyl aımaqtan 8 kásiporyn shyǵady dep josparlanýda. Ortasha kvıtansıa 200 teńgege nemese 25%-ke ósedi.
Sý burý salasynda 26 kásiporynnyń tozý deńgeıi 70%-ten asady, onyń ishinde 23 kásiporyn úshin ınvestısıalyq baǵdarlamalar bekitildi. Bul salaǵa 2023 jyly 15,3 mlrd teńge ınvestısıalanady.
Nátıjesinde jelilerdiń tozýy 74%-ten 71%-ke deıin tómendep, 2024 jyly qyzyl aımaqtan 3 kásiporyn shyǵady. Eki bólmeli páter úshin ortasha esep 220 teńgege nemese 30%-ke ulǵaıady.
"Osylaısha, barlyq komýnaldyq qyzmet boıynsha ortasha eseptiń ulǵaıýy shamamen 3-4 myń teńgeni quraıdy", - dedi Qýantyrov.
