Almaty qalasynyń burynǵy ákimi Baýyrjan Baıbektiń ákesi Qydyrǵalı Baıbekke qatysty sot júrip jatyr.
Qujat boıynsha Baıbektiń ákesine QR ÁQBtK-niń 319 baby boıynsha aıyp taǵylǵan. Bul bap boıynsha kúdikti jer ýchaskesine tıisti quqyǵy joq óndiristik, turǵyn úı, sharýashylyq, gıdrotehnıkalyq (sý sharýashylyǵy) nemese sharýashylyq-turmystyq obektilerdi zańsyz salǵany úshin jazaǵa tartylady.
Sonymen qatar, Qydyrǵalı Baıbekke taǵylǵan taǵy bir aıyp QR ÁQBtK-niń 463 babynyń birinshi bóligi boıynsha qaralady.
Iaǵnı, kásipkerlik nemese ózge de qyzmetpen aınalysqany, ruqsatsyz áreketter (operasıalar) jasaǵany, talap etiletin jaǵdaılarda habarlamany jibermegeni úshin jaýapqa tartylady.
Qydyrǵalı Baıbek – Almaty qalasynyń burynǵy ákimi Baýyrjan Baıbektiń ákesi. Eńbek jolyn temirjolshy bolyp bastaǵan. Sonymen qatar, ol Qazaqstannyń burynǵy prezıdenti Nursultan Nazarbaevtiń synyptasy, ári eks-prezıdentpen jaqsy qarym-qatynasymen tanymal.
Qydyrǵalı Baıbek zeınetkerlikke birer jyl qalǵanda "Almaty qalasynyń jolaýshylar tasymaly" MKQK bastyǵynyń orynbasary qyzmetine taǵaıyndalǵan bolatyn.
Aıta keteıik, onyń uly Baýyrjan Baıbek memlekettik qyzmetke joǵary mýzyka mektebin bitire salysymen birden kelgen.
2015 jyly Baýyrjan Baıbek Almaty qalasynyń ákimi bolyp taǵaıyndaldy. Ol bul qyzmetti 2019 jyldyń 28 maýsymyna deıin atqardy. Odan keıin NurOtan partıasy tóraǵasynyń birinshi orynbasary laýazymynan prezıdent Qasym-Jomart Toqaev partıa tóraǵalyǵyn alǵannan keıin ketti.
Baýyrjan Baıbek qańtar oqıǵasynan keıin elden ketip, qazir Germanıada turady.
