Astana qalalyq sotynda qańtar oqıǵasynan keıin QR İİM-nen resmı túrde keshirim suraýdy talap etken qyrǵyzstandyq mýzykant Vıkram Rýzahýnovtyń apelásıalyq shaǵymy qaraldy. 

Sot eshbir zańda kópshilik aldynda keshirim suraýdy talap etý joq ekenin málimdedi.

"Ar-namysty, qadir-qasıetti jáne iskerlik bedeldi sot arqyly qorǵaý kezinde  keshirim suraýǵa májbúrleý qarastyrylmaǵan. Eshkim májbúrli túrde óz pikiri men senimin bildire nemese olardan bas tarta almaıdy. Tıisinshe sot eshkimdi keshirim suraýǵa mindetteýge quqyly emes. Talapker málimdegen basqa talaptar boıynsha sot jeke sheshim shyǵardy", - dep habarlady sot.

Eske sala keteıik, buǵan deıin Astana qalasynyń Almaty aýdandyq soty qyrǵyzstandyq mýzykant Vıkram Rýzahýnovtyń Qazaqstan İİM atyna bergen ar-namysyn, qadir-qasıetin jáne iskerlik bedelin qorǵaý týraly aryzyn qanaǵattandyrýdan bas tartqan.

Ánshiniń qorǵaýshylary QR İİM-nen Rýzahýnovtyń almatylyq polıseıler qysymymen "Qazaqstanǵa 2022 jylǵy qańtardaǵy tártipsizdikterge qatysý úshin kelgeni" týraly jaýap bergenin alǵa tartqan edi. Sonymen qatar, olar bul aıǵaqtardy jalǵan dep tanýdy jáne mýzykanttan kópshilik aldynda keshirim suraýdy talap etken bolatyn.