Astanada «Nur Otan» partıasy tóraǵasynyń birinshi orynbasary Asqar Myrzahmetovtiń tóraǵalyǵymen jańa Eńbek kodeksiniń jobasyna qatysty kezekti keńes ótti. İs-sharaǵa QR Parlamenti Májilisiniń depýtattary, QR Densaýlyq saqtaý jáne áleýmettik damý mınıstri T.Dúısenova, QR Kásip-odaqtar federasıasynyń tóraǵasy Á.Qusaıynov jáne «Atameken» UKP Basqarma Tóraǵasynyń orynbasary N.Áltaev  qatysty.

Elbasynyń bes ınstıtýsıonaldyq reforma, «100 naqty qadam» Ult josparyn júzege asyrý maqsatynda daıyndalǵan qujatta áli de tolyqtyratyn tustar joq emes. Óıtkeni  halyqtyń tarapynan qyzý talqylanǵan Zań jobasyna túrli usynys-pikir bildirýshilerdiń qarasy qalyń.

Statısıkalyq málimetke súıensek, elimizde eńbekke aralasyp júrgenderdiń sany 5,9 mıllıon adamdy quraıdy. Bul rette Zań boıynsha daý týǵyzatyn normalar meılinshe rettelip, barlyq tarapqa tıimdi etip bekitilse, eńbek daýlary azaıyp, eńbekkerlerdiń quqyqtary saqtalmaq. «Nur Otan» partıasy Tóraǵasynyń birinshi orynbasary A.Myrzahmetov: ««Nur Otan» partıasy qarapaıym halyqtyń múddesin qorǵaı otyryp, jumysshylar men jumys berýshilerdiń arasyndaǵy eńbek qatynastarynda ádiletsizdikterdiń oryn alýyna jol bermeıdi. Elbasy N.Nazarbaevtyń Ult reformasyn iske asyrý aýqymynda partıa birneshe Zań jobalaryn daıyndap jatyr. Sonyń biri Eńbek kodeksi. Taıaýda birqatar oblystardy aralap, jurtshylyqpen kezdesýler ótkizip qaıttyq. Ásirese, Jambyl men Atyraý oblystaryndaǵy eńbek azamattary kodekstiń keıbir tustaryna qatysty synı kózqarastaryn bildirip jatty. Atap aıtqanda, jumysshylardyń eńbek merziminen tys ýaqytta, merekelik, demalys jáne túngi aýysymdaǵy jumysy úshin qosymsha aqy mólsherine qatysty normaǵa kóńilderi tolmaıdy. Sondyqtan da Zań jobasyn tıanaqtaý kezinde olardyń usynysy eskerilýi kerek. Óıtkeni kodekstiń jańa jobasy – áleýmettik qorǵanys pen ekonomıkalyq tıimdiliktiń arasyndaǵy utymdy tepe-teńdikti qalyptastyrý jolyndaǵy mańyzdy qadam bolyp tabylady», – deıdi. Partıa Tóraǵasy birinshi orynbasarynyń aıtýynsha, jaqynda óńirlerge jasaǵan saparynda Atyraýdaǵy fosforlyq zaýyt jumysshylary eńbek merziminen tys ýaqyttaǵy jumysy úshin tólemaqyny 2-den 1,25-ke deıin qysqartýdyń orynsyz ekendigin jetkizgen. Jobaǵa sáıkes tólemniń osy kólemin bekitip, qalǵany ujymdyq kelisimshart aıasynda taraptardyń kelisimimen qosylatyndyǵy jazylǵan. Al bul jaǵdaıdy Densaýlyq saqtaý jáne áleýmettik damý mınıstri Tamara Dúısenova bylaısha túsindiredi: «Qujatty ázirleý barysynda úsh jaqtyń – memlekettiń,  jumys berýshiniń jáne jumysshynyń  ózara mindetterin naqtylap, aıqyndap berdik.  Ásirese, qarapaıym eńbekkerlerdiń múddesin barynsha eskerdik. Eńbekaqyny tóleýdiń barlyq erekshelikterin umytpaı, áleýmettik járdemderdi de tıimdi etip, engizdik. Árıne, bul Zań jobasy qoǵamnyń eń belsendi tobyna tikeleı tıesili bolǵandyqtan, qyzý talqylaý da, syn da bolady. Endi memleket negizgi mindetterdi bekitedi. Atap aıtqanda, kúnine 8 saǵattyq, aptasyna 40 saǵattyq jumystan aspaý, eńbek qaýipsizdigin qamtamasyz etip jylyna 24 kúnnen kem emes eńbek demalysyn berý syndy standarttardy belgilep berdik. Ary qaraıǵy eńbek jumys berýshi men jumysshynyń arasyndaǵy kelisimshartpen retteledi. Al onyń oryndalýyn memlekettik bılik qadaǵalaıdy», ̶ deıdi.

Ótken apta basynda «Nur Otan» partıasynyń Parlament Májilisindegi fraksıa tóralqasynyń otyrysynda Eńbek kodeksi talqyǵa salynyp, birqatar tustaryna túzetýler engizilgen bolatyn. Atap aıtqanda, aımaqtarda jumysshylardyń kelispeýshiligin týǵyzǵan baptaryna barynsha kóńil bólingen. Nátıjesinde, depýtattar eńbekke merzimdik aqy tólenetin jaǵdaıda jumysshynyń bir kúndik tólemi 1,5 mólsherlemesinen kem bolmaı, kesimdi eńbekaqy tólenetin jaǵdaıda jumysshynyń bekitilgen kúndizgi tóleminiń elý paıyzyn  tóleý kerektigi týraly bastamaǵa qoldaý kórsetý týraly sheshim de qabyldanǵan. Óz kezeginde memleket mınımaldy standarttardy bekitip, eńbek qatynastarynyń barlyq sýbektileri tarapynan mindettemelerdiń oryndalýyna qatań qadaǵalaýdy qamtamasyz etýge tıis. Al Kásipkerlerdiń «Atameken» Ulttyq palatasy men Kásipodaqtar federasıasynyń ókilderi de Kodekske túzetý engizý bastamasyn qoldaıtyndaryn málimdedi. Aıta keterligi, Zań aıasynda aýyr óndiriste eńbek etetinder zeınetke 63 emes, 55 jasynda shyqpaq. Eńbek kodeksiniń jańa jobasy qazir Parlamentte qaralyp jatyr. Qarapaıym eńbekkerlerdiń múddesin kózdegen másele boıynsha tushshymdy oı-pikir aıtqan qatysýshylar jıyn sońynda ortaq uıǵarymǵa kelip, «Nur Otan» Fraksıasy músheleriniń usynysy Úkimetke joldanatyn boldy.

Derekkóz: "Túrkistan" gazeti