«Qamshy» portalynyń hat qorjynyna kelip túsken materıaldy oqyrman nazaryna usynýdy qup kórdik. Erkin aqparat alańy óz oqyrmandary men avtorlarynyń arasyn baılanystyrý maqsatynda kelgen hattarǵa mán beretinin jetkizgimiz keledi.

Aıtýly aqyn, belgili til janashyry, «Ulttyq Keńes» qoǵamdyq uıymynyń tóraǵasy M.Shahanov 12-qazan kúni Almaty qalasynda atalmysh uıym basshylary men birneshe qoǵam múshelerniń basyn qosyp, jıyn ótkizdi.

          Jıyn barysynda búgingi kúni qordalanyp qalǵan birneshe máseleler kóterildi. M.Shahanov ózderi qurǵan «Halyq rýhy» partıasynyń birneshe jyldan beri tirkelmeı kele jatqandyǵyna toqtalyp, soǵan oraı ózi senim bildirgen keı jigitterdiń ózge partıalardy tónirekteı bastaǵanyna alańdaýshylyq bildirdi. «Jasyldar» partıasyn qurýǵa nıet bildirgenderdiń qasynan óz orynbasary J.Ákimniń boı kórsetýine múlde kelispeıtindigin ashyq aıtty. «Jasyldar» partıasyn qazaq ultyn masqaralap júrgen M. Telibekov degenniń de tóńirektep júrgendiginen-aq ol partıanyń bolashaǵy joq ekendigin ańǵarýǵa bolatyndyǵyn tilge tıek etti. Ókinishke qaraı qazaqty tili jetkenshe qorlap júrgen M.Telibekovtiń deńgeıine deıin quldyraý «Ulttyq Keńeske» abyroı ápermeıtindigin, sondyqtan óz orynbasaryn ondaı arandatýshylardan aýlaq bolýǵa shaqyrdy. 

          M.Shahanov sonymen qatar, sol M.Telibekovtiń qazaq halqyn qorlaǵan azǵyndyqqa toly «veter s ýlısy» degen kitabyn S.Mámbetalınniń de ınternettegi óz paraqshasynda qoldap, nasıhattap júrgendigine toqtalyp, onyń bul is-áreketi múldem aqylǵa syımaıtyndyǵyn, sondyqtan onyń mundaı teris baǵyttan qaıtýyn talap etti. Bulaı kete berse mundaı keleńsizdikterdiń ózine jáne qoǵamnyń atyna kóleńke túsiretindigin aıta kele, qoǵam múshelerin baısaldy, parasatty jolýǵa shaqyrdy.

          Muhańdy «Ulttyq Keńes» tóraǵasynyń orynbasary E.Raqyshevty qoldap, M.Telibekovtyń kitabyn azǵyndyqqa balady. Ol «jas jetkinshekter sanasyn ýlap, azǵyndyq kitap jazǵan M.Telibekovke «Ulttyq Keńes» atynan tosqaýyl qoıýymyz qajet» dedi. E.Raqyshev sonymen qatar, «Ulttyq Keńes» qoldamaǵan máselerdi kóterip júrgenderdiń qasynan tabylatyndardy da batyl aıyptady. Bul turǵyda ol S.Mámbetalın men E.Narymbaevtyń M.Telibekovtyń nasıhattaǵandyqtaryn azǵyndyqty qoldaý dep  S.Mámbetalınniń betine basty.

          Áriptesteri synyna ilingen S.Mámbetalın óziniń M.Telibekovti qoldamaıtynyn, qaıta ony sotqa bergenderdi qoldaý úshin kitabyn aıǵaq retinde jarıalaǵandyǵyn aıtyp, aqtaldy.

          Másele mánin saralaı kele «Ulttyq Keńes» M.Telibekovtiń bul is áreketine jáne de basqa ulttyq máselelerge qatysty málimdeme jasaýǵa ýaǵdalasty. Jıyn barysynda ózge de máseleler qaraldy.