Qyrǵyz-tájik shekarasynda eki el turǵyndary taǵy da qaqtyǵysyp qaldy. Qyrǵyzstan İİM aýmaqtyq bólimshesiniń qyzmetkerine Tájikstan azamattary shabýyl jasaǵan.

Bul týraly Qyrǵyz Respýblıkasy Ulttyq qaýipsizdik memlekettik komıtetiniń Shekara qyzmeti habarlady.

"2023 jyldyń 24 shildesinde memlekettik shekaranyń qyrǵyz-tájik ýchaskesinde shekaralas aımaqtardyń turǵyndary arasynda janjal boldy" - delingen vedomstvo habarlamasynda.

Oqıǵa ornyna Qyrǵyzstan İİM aýmaqtyq bólimshesiniń qyzmetkeri jetken kezde oǵan Tájikstan azamattary, Hodjaı-Aalo aýylynyń turǵyndary shabýyl jasaǵan.

Shıelenistiń órshýine jol bermes úshin Qyrǵyzstan men Tájikstannyń shekara ókilderi arasynda kelissóz júrgizilip jatyr. Qyrǵyzstannyń shekara qyzmeti respýblıka azamattaryn úreı men ashýǵa boı aldyrmaýǵa jáne barlyq aqparatty memlekettik organdardan naqtylaýǵa shaqyrdy.