28 shildege qaraǵan túni qamaýdaǵy jýrnalıs Dýman Muhammedkárimniń on shaqty jaqtasy Qonaev qalasyndaǵy Almaty oblystyq prokýratýrasynyń aldynda túnep shyqty.

Olar ashtyq jarıalap jatqan qamaýdaǵy jýrnalıs Dýman Muhammedkárimniń talaptaryn oryndap, ony Taldyqorǵannan Almatydaǵy tergeý ızolátorǵa aýystyrmaıynsha bul jerden ketpeıtinin aıtqan. Bul týraly Azattyq radıosy habarlady.

Juma kúni kúndiz prokýratýra aldyna jınalǵandar qarasy kóbeıe túsken.

Belsendi Murat Ospanovtyń aıtýynsha, túngi saǵat 12-ler shamasynda polısıa qyzmetkerleri olardyń ne úshin turǵandaryn suraǵan. Biraq prokýratýra aldyna qonýlaryna kedergi jasamaǵan. 

Eske sala keteıik, buǵan deıin oblystyq prokýratýranyń Dýman Muhammedkárimdi Almatydaǵy tergeý ızolátoryna aýystyrýǵa keliskeni habarlanǵan edi. Advokaty Ǵalym Nurpeıisovtiń aıtýynsha, 5 shildeden beri ashtyq jarıalap jatqan jýrnalıs Dýman Muhammedkárimniń jaǵdaıy nashar.