1 shildeden bastap kúshine enetin jańa áleýmettik kodekske sáıkes zeınetaqy qorynan aqsha alý erejelerine de ózgerister engiziledi.

Buǵan deıin aýyr eńbek jaǵdaıynda jumys isteıtin qyzmetkerler mindetti zeınetaqy jarnasy men kásiptik zeınetaqy jarnasyn baspana alýǵa nemese emdeýge jumsaı alatyn. Endi budan bylaı birjolǵy zeınetaqy tólemin alar kezde bul jumysshylardyń kásiptik zeınetaqy jarnasy eseptelmeıdi.

Demek azamattar jarnanyń bul túrin úı alýǵa nemese emge jumsaı almaıdy. Esesine senimgerlik basqarýǵa bererde esh kedergi bolmaıdy.

"Mindetti zeınetaqy jarnalary jáne mindetti kásiptik zeınetaqy jarnalary esebinen zeınetaqy jınaqtaryn ınvestısıalyq portfeldi basqarýshynyń (IPB) senimgerlik basqarýyna berý kezinde zeınetaqy jınaqtarynyń eń tómengi jetkiliktilik shegi budan bylaı eskerilmeıdi. Áleýmettik kodeks kúshine engen kezden bastap salymshy atalǵan zeınetaqy jınaqtarynyń 50 paıyzyna deıin IPB-nyń senimgerlik basqarýyna berýge quqyly", – delingen qujatta. 

Sonymen qatar, azamattar birjolǵy zeınetaqy tólemderin jaqyn týystarynyń emine nemese baspana jaǵdaıyn jaqsartýǵa jumsaı alady.

Jaqyn týys sanatyna ata-ana, týǵan nemese asyrap alǵan balalar, asyrap alýshylar, ata-áje jáne nemereler kiredi.