Qazaqstan turǵyndary sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsınniń otstavkaǵa ketýin talap etip, petısıaǵa qol qoıyp jatyr. 

"2023 jyly 11 shildede Baǵdat Mýsın Prezıdent Qasym-Jomart Toqaevpen kezdesip,  ınternettiń álsiz bolýynyń sebebi "baǵanyń tómendigi men qazaqstandyqtardyń ǵalamtordy óte belsendi qoldanýy" dep málimdedi. Osydan keıin barlyq qazaqstandyq uıaly baılanys operatorlary ınternet sapasy sol deńgeıde qalǵanyna qaramastan, óz tarıfteriniń baǵasyn birden kóterdi. Tipti, Qazaqtelekom sońǵy paıdalanýshy úshin tańdaý qaldyrmaı, muraǵat tarıfteriniń baǵasyn kóterdi", - delingen petısıa mátininde.

1 tamyzdaǵy kórsetkish boıynsha Mýsınniń otstavkaǵa ketýin 12,6 myńnan astam adam qoldaǵan. Al 400-den astam adam mınıstrdiń ketýine qarsy daýys berdi.

Eske sala keteıik, buǵan deıin Mýsın Astana ınternet jyldamdyǵy jaǵynan Tokıony basyp ozatynyn aıtqan bolatyn.