Qazaqstanda qaıtarylǵan aktıvterdi basqaratyn kompanıa qurý josparlanyp otyr.
Úkimet qaýlysynyń jobasy "Ashyq NQA" portalynda jarıalandy.
"Jarǵylyq kapıtalyna memleket 100 paıyz qatysatyn "Qaıtarylǵan aktıvterdi basqarý kompanıasy" jaýapkershiligi shekteýli seriktestigi qurylsyn", - delingen qaýly jobasynda.
Seriktestiktiń negizgi maqsatyna "Zańsyz ıemdenilgen aktıvterdi memleketke qaıtarý týraly" Qazaqstan Respýblıkasynyń zańynda jáne basqa da zańdar men normatıvtik-quqyqtyq aktilerde belgilengen tártippen qaıtarylǵan aktıvterdi basqarý, saqtaý, ótkizý jumystary kiredi.
"Memleketke qaıtarylǵan aktıvterdi onyń atynan menshikke alý, memleket kirisine aınaldyrylǵan aktıvterdiń saqtalýyn qamtamasyz etý jáne kútip ustaý, aktıvterge ıelik etý, Arnaıy memlekettik qorǵa aktıvterdi satýdan túsken qarajatty aýdarý basqarýshy kompanıanyń mindetterine jatady", - delingen qujatqa túsindirme jazbada.
Jobany júzege asyrýǵa respýblıkalyq búdjetten qarajat bólýdiń qajeti joq.
Eske salaıyq, 12 shildede Qazaqstan prezıdenti Qasym-Jomart Toqaev "Zańsyz ıemdenilgen aktıvterdi memleketke qaıtarý týraly" zańǵa qol qoıǵan bolatyn.
Pikir qaldyrý