Qaraǵandy oblysynda balalar jappaı ýlanyp, bir bala qaıtys boldy. Alty bala jansaqtaý bóliminde jatyr. Bul týraly elimizdiń bas sanıtar dárigeri Aıjan Esmaǵambetova habarlady.

"12 bala aýrýhanaǵa túsken. Ázirge olardyń neden ýlanǵany belgisiz. Ókinishke oraı bir bala qaıtys boldy. 6 bala jansaqtaý bóliminde jatyr. Bes balanyń jaǵdaıy ortasha. Barlyǵy er bala. Aýrýhanaǵa alǵashqy bala 30 shilde keshke tústi" - dedi Esmaǵambetova.

Oqıǵa Qaraǵandy oblysynyń balalarǵa arnaýly áleýmettik qyzmet kórsetý ortalyǵynda bolǵan. 

Qaraǵandy oblysy ákimdiginiń habarlaýynsha, oqıǵanyń sebebin anyqtaý úshin arnaıy komısıa quryldy. Oqıǵaǵa qatysty qylmystyq is qozǵalyp, Qaraǵandy oblysynyń arnaıy prokýrorlar basqarmasyna berildi.

Bas prokýratýranyń baspasóz qyzmeti balalardyń tamaqtan ýlaný faktisi boıynsha Qaraǵandy oblysynyń balalarǵa arnaýly áleýmettik qyzmetter kórsetý ortalyǵy KMM-ǵa qatysty qylmystyq kodekstiń 304-babynyń 2-bóligi (aýyr zardaptarǵa ákep soqtyrǵan sanıtarlyq erejelerdi nemese gıgıenalyq normatıvterdi buzý) boıynsha sotqa deıingi tergeý bastalǵanyn habarlady.