Densaýlyq saqtaý vıse-mırıstri – bas memlekettik sanıtarlyq dáriger Aıjan Esmaǵambetova Almaty aýrýhanasynda VICH juqtyrý boıynsha tekseristiń nátıjesin jarıalady, dep habarlaıdy Sputnik Qazaqstan.
Maýsym aıynda Almatydaǵy ortalyq klınıkalyq aýrýhanada emdelgen úsh naýqas VICH juqtyryp alǵan. Bas sanıtardyń aıtýynsha, úsheýi de jansaqtaý bóliminde jatqan. Ol jerde taǵy bir pasıent bolǵan.
"Dál osy pasıent aýrýhanaǵa basqa aýrýmen túsken. Aldymen ınfeksıalyq aýrýhanada emdeldi. Ol jaqta VICH-ke test tapsyrǵanda teris nátıje shyqqan. Al ortalyq klınıkalyq aýrýhanaǵa túskennen keıin taǵy bir synama alyndy, sol kezde kúdik týǵyzatyn nátıje shyqty. Bul degenimiz, vırýs ınkýbasıalyq kezeńnen ótip jatyr, eki aptadan keıin taǵy synama alý kerek. Sonda naqty nátıje shyǵady. Ókinishke qaraı, ol adam negizgi aýrýynan qaıtys boldy. Sondyqtan qosymsha synama alynbaı qaldy”, - dedi Esmaǵambetova úkimette ótken brıfıńte.
Tekseriske sáıkes, qaıtys bolǵan naýqas pen VICH-ti juqtyrǵan adamdardyń vırýsy birdeı bolyp shyqty. Komısıa músheleri jansaqtaý bóliminde ınvazıvti sharalar kezinde qaýipsizdik talaptary saqtalmady degen qorytyndyǵa keldi.
"Al jansaqtaý bóliminde san alýan ınvazıvti sharalar jasalady. Ineksıa, sıstema, kateter jáne taǵy basqa. Vırýs osy joldarmen ǵana taraıdy", - dep atap ótti Esmaǵambetova.
Komısıa naqty qandaı shara kezinde úsh adamnyń VICH juqtyrǵanyn aıta almaı otyr. Sebebi beınejazba joq.
Aıta keteri, osy oqıǵadan keıin aýrýhananyń bas dárigeri qyzmetinen shettetildi. Al onyń orynbasary men jansaqtaý bóliminiń qyzmetkerleri jumystan bosatyldy. Olar ınfeksıalyq qaýipsizdik boıynsha qajetti daıyndyqtan da ýaqytynda ótpegen. Tergeý sharalary jalǵasyp jatyr. Aldaǵy ýaqytta sot óz sheshimin shyǵarady.
Pikir qaldyrý