Almaty taýlarynda úsh táýlikten beri er adam izdestirilip jatyr, - dep habarlaıdy TJM baspasóz qyzmeti.

5 tamyzda 39 jastaǵy týrıs jalǵyz ózi Shymbulaq - Talǵar asýy (3163 metr) - Bogdanovıch muzdyǵy (3500 metr) - Abaı shyńy (4010 metr) baǵyty boıynsha kóterilmek bolǵan. Tanystaryn eskertip, sol kúni keshki 21:00-de qaıtyp keletinin aıtqan, alaıda sodan keıin baılanysqa shyqpaǵan.

"Er adamdy izdeýge dereý TJD qyzmetkerleri, TJM Respýblıkalyq jedel-qutqarý jasaǵynyń qutqarýshylary men kınologıalyq eseptoptary, qutqarý qyzmetteri men "Dobrospas" volonterleri jiberildi. Qutqarýshylar túni boıy taýda týrısi izdedi.

6 tamyzda tańerteń TJD qyzmetkerleri izdestirýge ushqyshsyz ushý apparattaryn qosty. TJM Qazavıaqutqarý avıaborty da ushýǵa daıyn boldy. Alaıda, taýly aımaqtaǵy aýa-raıynyń nasharlaýyna jáne qatty jańbyrǵa baılanysty ushýǵa ruqsat berilmedi", - deıdi TJM ókilderi.

İzdeý-qutqarý operasıasyna Álpınızm federasıasynyń qyzmetkerleri de qosyldy. Bir táýlik ishinde TJM jáne erikti qutqarý qyzmetteriniń qyzmetkerleri joǵalǵan týrısiń taý baǵyty boıynsha barlyq izdeý aımaqtaryn: Chertovo shatqaly, Qarlytaý shyńy, Hrıshatyı shyńy, Talǵar asýy, Abaı shyńy, Bogdanovıch muzdyǵyn barynsha qamtydy. İzdeý jumystary túnde de toqtaǵan joq.

"Búgin de izdestirý-qutqarý jumystary jalǵasady, TJD qyzmetkerleri taýdaǵy aýa-raıy jaqsarǵannan keıin ushqyshsyz ushý apparatyn iske qosty. İzdeý ornynda TJD, TJM Respýblıkalyq jedel-qutqarý jasaǵynyń otyzdan astam qyzmetkeri, erikti qutqarý qyzmetiniń eriktileri, qalalyq qutqarý qyzmetiniń qutqarýshylary, Almaty qalasynyń Álpınızm federasıasynyń ókilderi, eki kınologıalyq eseptop jáne ushqyshsyz ushý apparaty jumyldyryldy", - delingen TJM baspasóz qyzmeti taratqan habarlamada.

Joǵalǵan adamnyń taý baǵyty tek daıyndalǵan týrıserge arnalǵan. Atalmysh baǵyt álpınızm daǵdylaryn jáne arnaıy jabdyqtarmen jumys isteý qabiletin qajet etedi.

TJM qutqarýshylary taýǵa jalǵyz kóterilý jáne marshrýtty ózgertý qaýipti ekenin eske salady.