Sotqa tartylǵan toǵyzdyń beseýi – Qańtar oqıǵasy kezinde Tarazda mert bolǵandar. 7 aqpanda shyǵarylǵan úkimde aıyptalǵandardyń bári byltyr qańtardyń 6-syna qaraǵan túni "qoǵamǵa qaýipti is-áreketin uǵyna otyryp, qıratý, órteý, múlikti joıý, atys qarýyn qoldaný jáne bılik ókilderine qarýly qarsylyq kórsetýge ulasqan jappaı tártipsizdikke qatysqany", "bılik ókilderiniń zańdy talaptaryna baǵynbaı, jappaı tártipsizdik jasaýǵa shaqyryp, oq-dárini zańsyz ıemdenip, saqtaǵany, tasymaldaǵany jáne alyp júrgeni" aıtylǵan.

"Sottalýshylardyń kinási dálelin tapty" degen edi sýdıa Baǵlan Tórebekuly

Sot Marat Bekbaý buǵan deıin de sotty bolǵanyn eskerip, ony eki jylǵa bostandyǵynan aıyrýǵa jáne jazasyn qaýipsizdigi joǵary túzeý mekemesinde óteýge úkim etken.

Asqat Tashekeevti de eki jylǵa bostandyǵynan aıyryp, amnıstıaǵa ilinýine baılanysty sot zalynan bosatty.

Ǵanı Kerimbaevty úsh jylǵa bas bostandyǵynan aıyrdy. "Raqymshylyq týraly" zań qoldanylýyna baılanysty jaza merzimi qysqaryp, ol merzim endigi ótelgendikten, Kerimbaev sot zalynan bosatyldy. Nurbol Erejepovke de úsh jyl qamaý jazasy kesildi. Alaıda "Raqymshylyq týraly" zań boıynsha jaza merzimi qysqartylyp, shartty túrde toǵyz aıǵa bostandyǵynan aıyryldy.

Al Qańtarda qaza tapqan Isataı Donbaev, Raıs Rysbekov, Erjan Baıjanov, Nursultan Qýatbaev pen Toqtar Oshaqbaıǵa jaza taǵaıyndalmaǵanymen, sot beseýin de kináli dep tanyǵan edi.

İs apelásıalyq satyǵa Marat Bekbaýdyń jáne sottalǵandar qaıtys bolsa da kináli dep tanylǵan bes azamattyń qorǵaýshylary men zańdy ókilderiniń shaǵymdary boıynsha tústi.

“Sot alqasy bir sottalǵanǵa qatysty sot úkiminiń kúshin joıdy. QK-niń 272-b. 2-b.-men taǵylǵan aıyp boıynsha K.-nyń is-árekettinde qylmys quramynyń bolmaýyna baılanysty kúshi joıylyp, qylmystyq is óndirisimen toqtatyldy. Apelásıa aıyptaý boıynsha dáleldemelerdiń jıyntyǵy ony kináli dep taný úshin jetkiliksiz dep sanady. K.-nyń qylmystyq jaýapkershilikke zańsyz tartylýyna baılanysty sottalǵannyń ókiline aqtaý quqyǵy tanyldy. Sonymen qatar qalǵan sottalǵandarǵa qatysty úkim kúshinde qaldyryldy. Sot alqasy olardyń kinási dáleldengen degen qorytyndyǵa keldi. Sottalǵandar B., T., E., K., B., R., D., O.-nyń kinási sotta jaýap alynǵan kýálerdiń - oqıǵanyń kýágerleriniń olardyń jappaı tártipsizdikterge belsendi qatysqan tulǵalar retinde naqty kórsetken aıǵaqtarymen rastalady”, – delingen oblystyq sot habarlamasynda.

Al Marat Bekbaýdyń jazasy aýyrlaı tústi.

“Sot alqasy zańnamaǵa engizilgen ózgeristerge baılanysty asa aýyr qylmysy úshin ótelmegen sottylyǵy bar sottalǵan B.-ǵa túzeý mekemesiniń túrin tótenshe qaýipsizdikten barynsha joǵaryǵa aýystyrdy”, – dep málim etti sottan.